سوودانی: سەروەری عێراق و بەژەوەندی گەلەکەی سازشی لەسەر ناکرێت

 

ئاڤا نیوز

 

سەرۆکوەزیرانی عێراق ڕایدەگەیێنێت، حکومەت پرەنسیپی پاراستنی بەرژەوەندییە نەتەوەییەکان و دامەزراندنی پەیوەندییەکانی لەسەر بنەمای ڕێزی هاوبەش و بەدیهێنانی بەرژەوەندیی هاوبەش پەیڕەو کردووە، جەختی لەوە کردەوە کە ناکرێت سەروەری عێراق و بەرژەوەندییەکانی گەلەکەی سازشی لەسەر بکرێت.

 

 

چیرۆکی سەرەکی: محەممەد شیاع سوودانی، سەرۆکوەزیرانی عێراق لە پەراوێزی سەردانە فەرمییەکەیدا بۆ لەندەن، لەگەڵ کۆمەڵێک لە توێژەر و ئەکادیمی و پسپۆڕان بەشداری سیمپۆزیۆمێک کرد کە لەلایەن پەیمانگای شاهانەی کاروباری نێودەوڵەتی/چاتام هاوس ڕێکخرابوو.

 

ڕاگەیێنراوی فەرمی: بەگوێرەی ڕاگەیێنراوێکی نووسینگەی سەرۆکوەزیرانی عێراق سوودانی لە میانی سیمپۆزیۆمەکەدا جەختی لەوە کردەوە:

-  حکومەت بەرنامەیەکی جێبەجێکاری دەستپێکردووە کە بریتییە لە گەیشتن بە چاکسازی ڕیشەیی لە بوارە جۆراوجۆرەکانی گەشەپێدان و خزمەتگوزاری و ژێرخانی بۆ ئاوەدانکردنەوەی وڵات و باشترکردنی ژیانی هاووڵاتیان، دیارترینیان ڕێوشوێنەکان بۆ بەرەنگاربوونەوەی گەندەڵی و چاکسازی لە سیستەمی دارایی و بانکیدا بۆ پەرەپێدانی ژینگەی بازرگانی و وەبەرهێنان.

 

- ئاماژەی بە پشتیوانی حکومەت بۆ کەرتی تایبەت کرد، وەک یەکێک لە ئامانجەکانی کارنامەی حکومەت کە ئامانجی پێشخستنی کەرتی ئابووری و پاڵپشتی گەشەکردنیەتی لەڕێگەی هاوبەشییەکی ڕاستەقینەی نێوان کەرتی گشتی و تایبەت بۆ گەیشتن بە ئامانجە دیاریکراوەکان.

 

زانیاریی زیاتر: سوودانی ڕۆڵی سەرەکی عێراقی لە ناوچەکەدا دووپاتکردەوە، هاوکات هەوڵەکانی بۆ پشتیوانیکردن لە سەقامگیری و ئارامی، بەتایبەتی لە ڕێگەی پەیوەندییە هاوسەنگەکانییەوە، بەتایبەتی لەگەڵ ئێران و ئەمریکا، ئاماژەی بە پێویستی کارکردن و هەماهەنگی بۆ پاراستنی ئاسایش لە سەرتاسەری ناوچەکەدا کرد، لە ڕێگەی پشتیوانیکردن لە یەکڕیزیی سووریا و وەستان لە پاڵ گەلەکەیدا و جێگیرکردنی سەقامگیری لە لوبنان و ئارامی لە ناوچەکانی فەلەستین.