لە پێنجوێن هەڵمەتی قەدەغەکردنی جگەرەی ئەلیکترۆنی فراوانتر دەکرێت

ئاڤا نیوز

 

لە قەزای پێنجوێن هەڵمەتی دەستبەسەرداگرتنی جگەرەی ئەلیکترۆنی بەشێوەیەکی فراوان دەستپێدەکات، قایمقامی قەزاکەش لەوبارەیەوە دەڵێت، "بڕیارەکە وەکو خۆی جێبەجێ دەکەین".

 

وێنە گەورەکە: لە ڕێککەوتی 01-01-2024 لەسەر داوای وەزارەتی ناوخۆی هەرێمی کوردستان، داواکاریی گشتی بڕیاری قەدەغەکردنی جگەرەی ئەلیکترۆنی و جۆرەکانی دەرکرد، بڕیارەکەش هەر زوو چووە بواری جێبەجێکردنەوە.

 

لێدوانی فەرمی: هێمن ئیبراهیم، قایمقامی قەزای پێنجوێن بە ئاڤا میدیای ڕاگەیاند: بڕیاری قەدەغەکردنی جگەرەی ئەلیکترۆنی (ڤەیپ) لای ئێمە بەشێوەیەکی فراوانتر دەستپێدەکات، دەتوانم بڵێم پێنجوێن یەکەم شوێنە لەسەر ئاستی کوردستان بڕیارەکەی وەک خۆی جێبەجێ کردووە.

 

قایمقامی قەزای پێنجوێن گوتیشی: "گەنجانی دەڤەرەکە گلەیی ئەوەیان لێ دەکەن، کە لە شوێنەکانی دیکە بەو شێوەیە ڕێکارەکان توند نین، بەڵام ئێمەش پێیان دەڵێین بڕیارە و وەک خۆی جێبەجێی دەکەین".

 

ئەوەی پێویستە بیزانیت: هەڵمەتی گەڕان و ئاگادارکردنەوەکان ناوەندەکانی خوێندنیش دەگرێتەوە، لەو چوارچێوەیەشدا سیمیناری تایبەت بۆ مامۆستایان دەکرێت، تاوەکو وشیاریی لەبارەی زیانەکانی جگەرەی ئەلیکترۆنی بڵاوبکەنەوە.

 

ئەمەش بزانە: هەر شوێنێک جگەرەی ئەلیکترۆنی بفرۆشێت یان مامەڵەی پێوە بکات سزا دەدرێت، لە ئەگەری دووبارەکردنەوەی ڕێکارەکان و سزاکان توندتر دەکرێت.