وەزارەتەکانی دەرەوە و بەرگریی ئەڵمانیا ناڕەزایی بەرامبەر بە ئێکس دەردەبڕن و بایکۆتی دەکەن

ئاڤا نیوز

هەر دوو وەزارەتی دەرەوە و بەرگریی ئەڵمانیا ڕایانگەیاند، وەک دەربڕینی ناڕەزایی بەرامبەر بە تۆڕی کۆمەڵایەتیی ئێکس کە ئیلۆن مەسک خاوەندارێتی دەکات، ماڵئاوایی لەو تۆڕە کۆمەڵایەتییە دەکەن و چیدی تێیاندا چالاک نابن.

وێنە گەورەکە: ئەڵمانیا ئیلۆن مەسک بە دەستتێوەردان لە کاروباری ئەڵمانیا تۆمەتبار دەکات. مەسک بەم دواییانە سوکایەتیی بە ئۆڵاف شۆڵز، ڕاوێژکاری ئەڵمانیا کردووە و بە "گەمژەیەکی ناشایستە" وەسفی کردووە، ئەو هەروەها پشتیوانی لە پارتی ڕاستڕەوی 'ئەڵتەرناتیڤ بۆ ئەڵمانیا' کردووە. 

ئەوەی پێویستە بیزانیت: مەسک، کە دەوڵەمەندترین کەسی جیهانە، لە نووسینەکانیدا ڕەخنەی لە بابەتی کۆچ گرتووە و گوتوویەتی پرسی کۆچبەران هەڕەشەیە بۆ سەر داهاتووی وڵاتانی ئەوروپا. 

ڕاگەیێنراوی فەرمی: وەزارەتی بەرگریی ئەڵمانیا ڕایگەیاندووە لەمەبەدوا بۆ گەیاندنی پەیامەکانیان لە بری ئێکس، واتسئاپ بەکار دێنن. وەزارەتی دەرەوەش گوتوویەتی لە 'بلو سکای' چالاکتر دەبن.