کابینەی ئەمنیی ئیسرائیل ڕێککەوتنی لەگەڵ حەماس پەسەند کرد

ئاڤا نیوز

 

کابینەی ئەمنی حکومەتی ئیسرائیل کۆبووەوە و تیایدا ڕێککەوتنی ئاگربەستی لە غەززە و ئازادکردنی بارمتەکان کە لەنێوان حەماس و ئیسرائیل پەسەند کرد.

 

وێنە گەورەکە: ساڵێک و سێ مانگە شەڕ لە غەززە هەڵگیرساوە، بە نێوەندگیری ئەمریکا و میسر و قەتەر دوای چەندین مانگ گفتوگۆ حەماس و ئیسرائیل گەیشتوونەتە ڕێککەوتن، ڕێککەوتنە سێ قۆناغ لەخۆدەگرێت، هەر قۆناغێکیش 42 ڕۆژ دەخایەنێت.

زانیاریی بەدەستهاتوو: کەمێک پێش ئێستا کابینەی ئەمنی حکومەتی ئیسرائیل کۆبووەوە و تیایدا ڕێککەوتنی ئاگربەستی لە غەززە و ئازادکردنی بارمتەکان کە لەنێوان حەماس و ئیسرائیل و بەنێوەندگیریی میسر، قەتەر و ئەمریکا واژۆ کرابوو، پەسەند کرد.

 

ڕاگەیێنراوی فەرمی: ڕۆژی چوارشەممە لەگەڵ ڕاگەیاندنی ئاگربەستدا بزووتنەوەی حەماس لە بەیاننامەیەکدا ئاماژەی بەوەدا: ڕێککەوتنی ئاگربەست لە کەرتی غەززە دەرەنجامی زیاتر لە 15 مانگ خۆڕاگری فەڵەستینیەکان بوو لە غەززە، هاوکات خاڵێکی وەرچەرخانە لە ململانێی گەلەکەمان لەگەڵ دووژمن، لەسەر بنەمای گەیشتن بە ئامانجەکانی.

 

لەلایەکی دیکەوە: پێشتر نووسینگەی بنیامین نەتانیاهۆ، سەرۆکوەزیرانی ئیسرائیل ڕایگەیاند: "لە شێوازی ئاگربەستی غەززە و ئازادکردنی بارمتەکان نیگەرانین، تاوەکو حەماس ئەو کێشانەی کە لە ئاگربەستەکە دروستیکردوون چارەسەر نەکات بڕیاری کۆتایی لەسەر نادەین، هاوکات حەماس لە هەندێک لە خاڵەکانی ڕێککەوتننامەکە پاشگەز بووەتەوە".

 

زانیاریی زیاتر: چاوەڕوان دەکرێت ڕۆژی یەکشەممە ڕێککەوتنی کۆتایی بە ئازادکردنی بارمتە و زیندانییەکان بچێتە بواری جێبەجێکردنەوە.