لە ئاکرێ بە تۆمەتی هەڵکوڵینی شوێنەوار پێنج کەس دەستگیر دەکرێت

ئاڤا نیوز

بەڕێوەبەرایەتیی ئاسایشی ئاکرێ پێنج کەس بە تۆمەتی هەڵکوڵینی شوێنی شوێنەواری لە دەوروبەری قەزای ئاکرێ دەستگیر دەکات.

چیرۆکی سەرەکی: 10 ڕۆژ لەمەوبەر لەلایەن چەند کەسێکەوە هەڵکۆڵین بۆ چەندین شوێنی شوێنەواری و گۆڕێکی کۆن لە گوندی میر باڵیا لە سنووری ناحیەی بجیل کراوە، دواتر لەلایەن ئاسایشی قەزای ئاکرێ چەند کەسێک دەستگیر کران.

لێدوانی فەرمی: هیوا شەماڵ، بەڕێوەبەری شوێنەواری قەزای ئاکرێ، بە ئاڤا میدیای ڕاگەیاند:

- دوای ئاگارکردنەوەمان لەلایەن ئاسایشی ئاکرێ سەبارەت بە دەستگیرکردنی چەند کەسێک بە تۆمەتی هەڵکۆڵێنی شوێنی شوێنەواری لە گۆڕستانێک، لێکۆلینەوەمان کرد و بۆمان دەرکەوت ئەم شوێنە دەگەڕێتەوە بۆ پێش ساڵی هەشتاکان و شوێنی شوێنەوارین و ڕاپۆرتی خۆمان دایە ئاسایش.

- دەبێت ئەو کەسانە بە پێی یاسای شوێنەوار سزا بدرێن، لە ساڵی 2014 لەگەڵ زانکۆی پۆڵەندی کار لەسەر شوێنەوار دەکەین و کارمان لەسەر 760 شوێنی شوێنەواری کردووە.

زانیاریی تایبەت: بەپێی بەدواداچونی ئاڤا، ئەو پێنج تۆمەتبارەی دەستگیرکراون، دوو کەسیان خەڵکی ئاکرێن، دووانی دیکەش خەڵکی هەولێرن، یەکێکیان خەڵکی ڕۆژهەڵاتی کوردستانە.

ئەوەی پێویستە بیزانیت: لە ساڵی 2024ـدا تەنیا لە قەزای ئاکرێ نۆ دۆسیە لەسەر تێکدان و هەڵکۆڵینی شوێنی شوێنەواری تۆمارکراوە، نزیکەی 50 کەسیش دەستگیرکراون.

ئەمەش بزانە: لە سنووری بەڕێوەبەرایەتیی شوێنەواری ئاکرێ زیاتر لە 700 شوێنی شوێنەواری و کەلەپووری هەیە.