فەتواكانی 14 ساڵی ئەنجوومەنی باڵای فەتوا لە لە كتێبێكدا كۆدەكرێنەوە

ئاڤا نیوز

یەكێتیی زانایانی ئایینی ئیسلامیی كوردستان 200 فەتوای ئەنجوومەنی باڵای فەتوا كە بەرهەمی 14 ساڵی ڕابردووە لە كتێبێكدا كۆدەكاتەوە و بڵاوی دەكاتەوە.

لێدوانی فەرمی: عەبدوڵڵا شێرکاوەیی، گوتەبێژی یەکێتیی زانایانی ئایینی ئیسلامیی كوردستان بە ئاڤا میدیای ڕاگەیاند: کتێبی (فەتواکانی ئەنجوومەنی باڵای فەتوا) یەکێکە لەو کتێب و سەرچاوە گرنگانەی کە بۆ یەکەم جارە لە مێژووی کورد بە کۆمەڵێک فەتوای گرنگ و ناوازە بە شێوازی زانستی و توێژینەوە و یەکانگیر لەگەڵ قورئان و فەرمودە دەکەوێتە بەر دیدی خوێنەران و بڵاودەبێتەوە.

- لەناو کتێب و سەرچاوە زانستییە ئایینییە کوردییەکان ئەمە بە یەکەم کتێب دادەندرێت، کە بەرهەمی مەلای کوردە و فەتوای کوردی بە شێوازی زانستی و ئەکادیمی لەخۆ دەگرێت، یەکێکیشە لەو بەرهەمە تایبەتانەی لە مێژووی یەکێتیی زانایان لە بواری فەتوا کۆکراوەتەوە.

- نزیکەی دوو ساڵە وەک یەکێک لە کارە لەپێشینەکان بە ئەنجام گەیاندنی ئەم پرۆژەیە بووە، تا ڕەنجی زانایانی ئەنجوومەنی باڵای فەتوا نەفەوتێت و ببێتە سەرچاوەی زانیاری و کارئاسانی لەبەر دەستی زانایان و زانستخوازان، سەرجەم ئەو فەتوایانەی لە نێوان ساڵانی 2010 تا 2024 دەرکراون، لەم کتێبە ناوازە دووبەرگییە و بە قەبارەی 900 لاپەڕە کۆکراونەتەوە کە ژمارەیان 200 فەتوای فەرمی جیاجیایە لە بواری پەرستش و مامەڵە و بابەتە هاوچەرخ و نوێیەكان.

باكگراوند: یەكێتی زانایانی ئایینی ئیسلامیی كوردستان، رێكخراوێكی پیشه‌یی تایبه‌ت به‌ كاروباری زانایانی ئایینی كوردستانه‌، باره‌گای سه‌ره‌کی له‌ هه‌ولێره‌، بۆ یه‌كه‌مجار له‌ رۆژی 21-9-1970 له‌ گه‌ڵاڵه‌ی ناوچه‌ی باڵه‌كایه‌تیی سه‌ر به‌ پارێزگای هه‌ولێر به‌ چاودێری‌ و ئاماده‌بوونی مه‌لا مسته‌فای بارزانی دامه‌زراوه‌.