بۆ جارا ئێكێ حكومەتا عیراقێ كچەكا ئێزدی ل سووریایێ رزگار كر

ئاڤا نیوز

ئەڤرۆ کچەکا ئێزدی ژ کەمپا هۆلێ یا ل سووریایێ هاتە رزگارکرن، و گەهشتە کەس و کارێن خوە، کو دبیتە جارا ئێکێ ئەڤ ڕێڤەبەريیا ڕزگاربوویان ل عیراقێ ڤی کاری بکەت.

لێدوانا فەرمی: سەراب ئەلیاس، رێڤەبەرا گشتی یا ڕزگاربوویان ل عێراقێ ڕاگەهاند؛ ب چاڤدێریا سەرۆک وەزیرێن عێراقێ و دەزگەهێ نشتیمانی و هێزێن کوردی ل سووریایێ، ئەڤرۆ شیان کچەکا ئێزدی ژ کەمپا هۆلێ رزگاربکەن و ڕادەستی کەس و کارێن وێ بکەن .

زانیاریێن زێدەتر: ئەڤ کچە ب ناڤێ کۆڤان عیدۆ یە و خەلکا کۆمەلگەها حەردانە ل باکوورێ چیایێ شنگالێ، د دەستپێکا هەیڤا شوباتا ئەڤسالەدا جهێ وێ هاتبوو دیارکرن، پشتی نەهـ سالان د دەستێ داعش دا ئەڤرۆ ب کەس و کارێن خوە شاد بوو . 

ئەوا پێدڤیە بزانی: ل ڕۆژا 3-8-2014 رێکخراوا تیرۆریستی یا داعش شنگال داگێرکر و زیدەتر ژ شەش هزار وەلاتیێن ئێزدی هاتبوونە ڕەڤاندن.

باگراوند: ل گۆری ئامارێن نڤیسینگەها کار و بارێن ڕەڤاندیان یا گرێدایی هەرێما کوردستانێ، هژمارا وان کەسێن هەتا نوکە ژ دەستێ داعش هاتینە رزگارکرن گەهشتیە سێ هەزار و  576 کەسان، دیسان هەتا نوکە دوو هەزار و  600 کەس د دەستێ داعش دا ماینە، و چارەنڤیسێ بەشەکی ژ  وان نەیێ دیارە .