لە مەخموور داوا دەکرێت ناسنامە و پاسپۆرت بۆ ئەسپ دەربهێنرێن

ئاڤا نیوز

بەڕێوەبەرایەتیی كشتوكاڵی مەخموور كە سەر بە بەڕێوەبەرایەتیی گشتیی كشتوكاڵی نەینەوایە، داوایەكی ئاراستەی خاوەن ئەسپەكانی سنوورەكە كردووە بۆ ئەوەی سەردانیان بكەن و ناسنامە و پاسپۆرت بۆ ئەسپەكانیان دەربكەن.

وێنە گەورەکە: لە شارۆچكەی مەخموور پاسپۆرت بۆ ئەسپەكانی سنوورەكە دروست ئەكرێت، لەمەودوا ئەسپسوارەكان یان خاوەنی ئەسپەكان لە بازگەكانی پشكنین دەبێت بەڵگەنامەی ئەسپەكانیان پێبێت، هاوشێوەی مەفرەزەی مروور، دەبێت ئەو پاسپۆرتەیان پێبێ بۆ ئەوەی بیسەلمێنن كە ( بەڵێ ئەم كەسە خاوەنی ئەم ئەسپەیە).

لێدوانی فەرمی: بەڕێوەبەرایەتیی كشتوكاڵی مەخموور دەڵێت:

- پاسپۆرت گرنگە بۆ بەخێوكەر بۆ گواستنەوە و سەلماندنی خاوەندارێیتی.

- لەمەودوا لە سنوورەكە ئەوە نامێنێت كە كەسێك ئەسپی خزمێكی یان هاوڕێیەكی ببات و بە ئارەزووی خۆی هاتوچۆی پێبكات، چونكە كە گەیشتە بازگەکان دەبێت بیسەلمێنێت كە خاوەنی ئەسپەكەیە و ئەم پاسپۆرتەی پێبێت، ئەگەرنا ڕێکاری یاسایی بەرامبەر دەکرێت.