ئاڤا بەدواداچوون بۆ کێشەی مامۆستایەکی خانەنشین دەکات

ئاڤا نیوز

مامۆستایەک دوای ئەوەی خانەنشین دەکرێت، نۆ ساڵی خزمەتی بۆ حساب ناکرێت، بەڕێوەبەرایەتیی گشتیی خانەنشێنی هەرێمی کوردستان لەوبارەیەوە دەڵێت 'دەبێت بەنووسراوی فەرمی خزمەتەکەی لەلایەن ئەنجوومەنی وەزیرانەوە پەسەند بکرێت'.

وێنە گەورەکە: مامۆستایەکی خانەنشینکراو کە لە ساڵی 1983 دامەزراوە و لە 2023 خانەنشینکراوە، باس لەوە دەکات لە ماوەی ئەو 40 ساڵەدا، تەنیا دوو ساڵ مۆڵەتی بێ مووچەی کردووە، هەروەها ماڵی بۆ بەغدا گواستەوە و نزیکەی نۆ ساڵ لە بەغدا مامۆستای کارا بووە کە گەڕاوەتەوە بۆ سلێمانی بە نووسراوی فەرمی ساڵەکانی خزمەتی لەگەڵ خۆی بۆ پەروەردەی شارەکە هێناوەتەوە و مووچەکەیان بۆ چاک کردووە، بەڵام کاتێک خانشینکراوە، ئەو نۆ ساڵەی خزمەتی بۆ هەژمار نەکراوە.

لێدوانی فەرمی: کوێستان جەلال عومەر، مامۆستای خانەنشینکراو بۆ ئاڤا میدیا گوتی: داواتان لێدەکەم بەدواداچوون بۆ کێشەکەم بکەن، کێشەکەی من لە بەڕێوەبەرایەتیی گشتیی خانەنشینی هەرێمی کوردستانە و نۆ ساڵی خزمەتیان لابردووم و دەڵێن بەڵگەت نییە کە لەوێ مامۆستایەتیت کردووە، من هەموو بەڵگەکانتان بۆ دەنێرم.

لەلایەکی دیکەوە: سەرچاوەیەک لە بەڕێوەبەرایەتیی گشتیی خانەنشینی هەرێمی کوردستان، بە ئاڤا میدیای ڕاگەیاند: دەبوو ئەو مامۆستایە ساڵەکانی خزمەتی بە نووسراوی فەرمی بۆ ئەنجوومەنی وەزیران ببردایە، بۆ ئەوەی پەسەندی بکەن و دواتر بۆی هەژمار دەکرا، ئێستاش ئەگەر بە نووسراوی فەرمی بۆ ئەنجوومەنی وەزیرانی ببات و پەسەند بکرێت، ئێمە ئەو نۆ ساڵەی بۆ هەژمار دەکەین.