تورکیا و عێراق لەسەر چەند دۆسیەیەک گەڕێکی دیکەی دانووستان دەستپێدەکەنەوە

ئاڤا نیوز

 بڕیارە مانگی داهاتوو تورکیاو عێراق لەبەغدا گەڕێکی دیکەی دانووستاندن ئەنجام بدەن لەسەر ئاسایشی سنوورەکانی نێوان هەردوو وڵات، هاوکاری لەسەر ڕووبەڕووبوونەوەی چالاکییەکانی پارتی کرێکارانی کوردستان، دۆسیەی ئاوو وزە، هاوکاری لە پڕۆژەی ڕێگای گەشەپێدان.

لێدوانی فەرمی: فوئاد حوسێن وەزیری دەرەوەی عێراق ڕایگەیاند: پەکەکە نەک تەنیا بۆ تورکیا، بۆ عێراقیش کێشەیە.

ئەوەی پێویستە بیزانیت: عێراق و تورکیا دوو بەڵگەنامە ئامادە دەکەن لەسەر ئاسایشی سنوورەکان و پەیوەندی دووقۆڵی، لە کۆبوونەوەی مانگی داهاتوو لەبەغدا گفتووگۆی لەسەر دەکەن و لەسەر بنەمای بەڵگەنامەکانپلانی کاری هاوبەش دادەنرێت.

زانیاریی زیاتر: لەپەراوێزی کۆڕبەندی دیپلۆماسی ئەنتاڵیا، فوئاد حوسێن وەزیری دەرەوەی عێراق و هاکان فیدان وەزیری دەرەوەی تورکیا کۆبوونەوە، باسی ئامادەکارییەکانی سەردانە چاوەڕوانکراوەکەی ڕەجەب تەیب ئەردۆغان سەرۆککۆماری تورکیایان بۆ عێراق کرد.

ئەوەی لەوبارەیەوە دەگوترێت: بەگوتەی چەند سەرچاوەیەک بۆ ڕۆژنامەی شەرقولئەوسەت، سەردانەکەی ئەردۆغان بۆ بەغدا پەیوەستە بە کۆمەڵێک دۆسیەوە کە تاوەکو ئێستا لەسەر نەگەیشتوونەتە ڕێککەوتن لەگەڵ عێراق، وەکو دۆسیەکانی پەکەکە، ئاو و وزە.