نەوت لە ناوچە شاخاوییەکانی هەڵەبجە دابەش دەکرێت

 

ئاڤا نیوز

قۆناغی یەکەمی دابەشکردنی نەوتی سپی بە نرخی پاڵپشتیکراو لە سنووری پارێزگاکانی هەرێمی کوردستان دەستیپێکرد، ئەمڕۆ لە پێنجوێن دابەش دەکرێت و سەرەتای هەفتەی داهاتوو دەگاتە هەڵەبجە.

وێنە گەورەکە: وەزارەتی نەوتی عێراق 26 ملیۆن و 300 هەزار لیتر نەوتی سپی بۆ پارێزگاکانی سلێمانی و هەڵەبجە تەرخانکردووە، لەو بڕە پێنج ملیۆن و 250 هەزار لیتر نەوت بۆ ناوچە شاخاوییەکانی سنووری پارێزگای هەڵەبجەیە، هەر خێزانێک 100 لیتری پێدەدرێت.

لێدوانی فەرمی: سەلام عومەر، ئەندامی لیژنەی دابەشکردنی سووتەمەنی لە بەڕێوەبەرایەتی نەوت و کانزاکانی سلێمانی بە ئاڤای گوت، "لە ڕۆژانی شەممە و یەکشەممە پرۆسەکە لە ناوچە شاخاوییەکانی سنووری پارێزگای هەڵەبجە دەستپێدەکات، هەوڵدەدرێت سەرجەم خێزانەکانی ئەو سنوورانە سوودمەند ببن."

ئەمەش بزانە: وەزارەتی سامانە سرووشتییەکانی هەرێمی کوردستان داوای بڕی 268 ملیۆن و 710 هەزارو 600 لیتر  نەوتی سپی کردبوو لە وەزارەتی نەوتی عێراقی فیدراڵ، بەڵام ڕەزامەندی لەسەر 50 ملیۆن لیتر بۆ سەرجەم پارێزگاکان دراوە کە پشکی %19ـی خێزانەکانە.