بڕی بەنزینی حکومی بە نرخی پاڵپشتیکراو دەبێت بە دوو ئەوەندە

 

ئاڤا نیوز

یەکێک لەو پاڵاوگانە بەنزینی حکومی بە نرخی پاڵپشتیکراو بۆ بەنزینخانەکانی هەرێمی کوردستان دابین دەکات، کاری چاککردنەوەی تەواوبووە و لەم دوو ڕۆژە دەست دەکات بە ناردنی بەنزین و پشکی پارێزگاکان بۆ دوو ئەوەندە بەرز دەبێتەوە.

چیرۆکی سەرەکی: لە ڕێگەی دوو پاڵاوگە بەگوێرەی ژمارەی دانیشتووان و ژمارەی ئۆتۆمبێل ڕۆژانە بڕێک بەنزین لە ڕێگەی تانکەرەوە بۆ پارێزگا و ئیدارە سەربەخۆکان دابین دەکرێت، هەر لیتری بە 750 دینار بە شوفێران دەدرێت، ماوەیەک بوو بەهۆی وەستانی یەکێک لە پاڵاوگەکان پشکەکە بۆ نیوە کەمبووەوە.

لێدوانی فەرمی: سەرچاوەیەک لە وەزارەتی سامانە سرووشتییەکان بە ئاڤای گوت، "لە دوو ڕۆژی داهاتوو پشکی پارێزگا و ئیدارە سەربەخۆکان بۆ دوو ئەوەندە بەرز دەبێتەوە و بڕێکی زیاتر لە بەنزینخانەکان دابەش دەکرێت و شوفێری زیاتر سوودمەند دەبن."

زانیاریی بەدەستهاتوو:  بە زیادکردنی بڕەکە، ڕۆژانە بڕی یەک ملیۆن و 548 هەزار لیتر کە دەکاتە 43 تانکەر بۆ پارێزگا و ئیدارە سەربەخۆکان دابین دەکرێت، ئەمە لە کاتێکدایە ئێستا ڕۆژانە 774 هەزار لیتر لە بەنزیخانەکان بە شوفێران دەدرێت.

زانیاریی زیاتر: گۆڕانکاری لە بڕی بەنزینی دابینکراو لە پارێزگاکاندا بەمشێوەیە دەبێت:-

هەولێر: ئێستا 396 هەزار لیتر،  دەبێتە 792 هەزار لیتر

سلێمانی و هەڵەبجە: ئێستا 180 هەزار لیتر، دەبێتە 324 هەزار لیتر

دهۆک: ئێستا 216 هەزار لیتر، دەبێتە 432 هەزار لیتر.