ترەمپ فشارەکان لەسەر ئێران زیاد دەکات

ئاڤا نیوز

 

بەرپرسێکی ئەمریکا ڕایدەگەیێنێ، چاوەروان دەکرێت ئەمڕۆ، دۆناڵد ترەمپ، سەرۆکی ئەمریکا فشارە توندەکانی خولی یەکەمی سەرۆکایەتییەکەی کە بەسەر ئێران سەپاندبووی، بگەڕێنێتەوە.

 

لێدوانی فەرمی: ئەو بەرپرسەی ئەمریکا کە نەیوویستووە ناوەکەی ئاشکرا بکرێت و قسەی بۆ ڕۆیتەرز کردووە، ئەوەی ئاشکرا کردووە ئەم فەرمانەی ترەمپ سەبارەت بە ئێران بە مەبەستی ڕێگریکردنە لە هەموو ئەو ڕێگایانەی ئێران بۆ بەرهەمهێنانی چەکی ئەتۆمی دەیگرێتەبەر و بەرپەرچدانەوەی کاریگەری خراپی ئێرانە لە ناوچەکە.

 

زانیاریی زیاتر: بەرپرسە ئەمریکییەکە ئەوەشی گوتووە، فەرمانەکەی ترەمپ وەزیری گەنجینەی ئەمریکا ڕادەسپێرێت بۆ ئەوەی زۆرترین فشاری ئابووری لەسەر ئێراندا بسەپێنێت، لەوانەش سەپاندنی سزای زیاتر بەسەر ئەو کەسانەی کە سزاکانی ئێستا پێشێل دەکەن.

 

لەلایەکی دیکە: مارکۆ ڕوبیۆ، وەزیری دەرەوەی ئەمریکا ڕایگەیاند، پێویستە فشاری زیاتر بخەینە سەر ئێران تاوەکو ئەو چالاکییانە ڕابگرن کە ئەنجامی دەدەن بۆ بەدەستهێنانی چەکی ئەتۆمی.

 

باکگراوەند: فشارە توندەکانی ترەمپ لەسەر ئێران لە خولی یەکەمی سەرۆکایەتییەکەی بە مەبەستی ئەوەبوو ئێران بچێتە سەر مێزی گفتوگۆ بۆ سنووردارکردنی بەرنامە ئەتۆمییەکەی و فراوانکردنی بازنەی ڕێککەوتنەکە بۆ ئەوەی مووشەکە بالیستییەکانی ئێران و هەروەها چالاکییەکانی دیکەی ئێران لە ناوچەکەدا بگرێتەوە.