محەممەد حافز بەبێ گەڕانەوەی بۆ پارێزگار دەوامی فەرمانگەکانی کەرکووک پەکدەخات

ئاڤا نیوز

دژ بە فەرمانە سالارییەکەی دادگای فیدراڵی بۆ ڕاگرتنی کارکردن بە یاسای لێبوردنی گشتی، سەرۆکی ئەنجوومەنی پارێزگای کەرکووک تاکلایەنە و بەبێ گەڕانەوەی بۆ پارێزگار، پەکخستنی کاری فەرمانگەکانی پارێزگاکەی ڕاگەیاند.

ئەوەی پێویستە بیزانیت: 21ی مانگی ڕابردوو پەرلەمانی عێراق لەکۆبوونەوەیەکی مشتومڕئامێزدا و بەیەک پاکێج یاسای لێبوردنی گشتی و باری کەسی و گەڕانەوەی موڵک بۆ خاوەنە ڕەسەنەکانیانی پەسەند کرد، لەسەر سکاڵای چەند پەرلەمانتارێکیش ئەمڕۆ دادگای فیدراڵی فەرمانێکی سالاری بۆ ڕاگرتنی کارکردن بەهەرسێ یاساکە دەرکرد، تا ئەو کاتەی دادگاکە بڕیاری خۆیی لەبارەی دەستورییبوونیان دەردەکات.

ڕاگەیێنراوی فەرمی: محەممەد حافز، سەرۆکی ئەنجوومەنی پارێزگای کەرکووک لە ڕاگەیێنراوێکدا ڕایگەیاند: 

- بڕیارەکەی دادگای فیدراڵی بۆ پەکخستنی یاسای لێبوردنی گشتی، لێدانە لە هاوبەشی نیشتیمانی و ڕێککەوتنەکان کە بنەمای ئارامی و دەستکەوتەکانی وڵاتە.

- وەک ئەنجوومەنی پارێزگای کەرکووک ڕایدەگەیێنین کە کاری ئەنجوومەنی پارێزگای کەرکووک و سەرجەم دامەزراوەکانی پارێزگاکە پەکدەخەین، ئەویش وەک نامەیەکی ناڕەزایی و هاوسۆزیی بۆ هەڵوێستی نیشتیمانیی بەشێک لە سەرکردە و پارێزگاکانی عێراق.

- بڕیارەکەی دادگای فیدراڵی بووەتە هۆی سەرسوڕمانی جەماوەرەکەمان و جەخت دەکەینەوە کە هاوسۆزیمان نیشانەی نەگۆڕی بنەماکانمانە لە پاراستنی یەکێتی عێراق و ئارامیی و ئاسایشی وڵات، وەفاشە بۆ خوێنی شەهیدان و گەرەنتیکردنی شایستە نیشتیمانییەکان، جەختیش دەکەینەوە کە کاردەکەین لەگەڵ هاوبەشە نیشتیمانییەکانمان بۆ دەرچواندنی یاسای دادگای فیدراڵی.

لەلایەکی دیکەوە: دژ بە فەرمانە سالارییەکەی دادگای فیدراڵی، پارێزگاکانی نەینەوا و سەڵاحەددین و ئەنباریش بڕیاریاندا سبەی لە هەموو دامودەزگاکانی پارێزگاکانیاندا دەوام ڕابگیرێت و بکرێتە پشوو.