لەسەر بەكارهێنانی وشەیەكی قورئان داوای هەڵوەشاندنەوەی وەزارەتێك دەكرێت

ئاڤا نیوز

لەسەر بەكارهێنانی وشەیەكی قورئان، لە دادگای فیدراڵی عێراق داوای هەڵوەشاندنەوەی وەزارەتێكی كوردستان دەكرێت، پارێزەرێکیش دەڵێ ئەم هەوڵە سووكایەتییە بە قوربانیانی ئەنفال و زیانی مەعنەوی بە سەدان هەزار كەسوکاری ئەنفالكراوان دەگەیەنێت.


وێنە گەورەكە: بڕیار وایە ڕۆژی 11-2-2025، دادگای باڵای فیدراڵی سەیری چوار سكاڵا بكات كە لەدژی هەرێمی كوردستان تۆماركراوە، ئەوانیش لابردنى مەرجەکانى فرەژنى لە هەرێمی كوردستان، هەڵوەشاندنەوەى هەردوو وەزارەتی شەهیدان و ئەنفالکراون و ئەوقاف و کاروباری ئاینی، دواهەمین سكاڵاش لابردنی پێبژاردنى هاتووچۆ و ڕسوماتى مەرجى تووندوتۆڵییە.

ئەوەی لەوبارەیەوە دەگوترێت: سكاڵاکە بۆ هەڵوەشاندنەوەی وەزارەتی كاروباری شەهیدان و ئەنفالكراوان تۆماركراوە، سەرەڕای ئەوەی داوا كراوە بكرێتە دەستە، داوای لابردنی وشەی (ئەنفالكراوان) كراوە، بەو پێیەی سكاڵاكار بیانووی وایە ئەو وشەیە لە قورئاندا هاتووە، پێچەوانەی حوكمەكانی ئایینی ئیسلامە و بەگوێرەی ماددەی دووی دەستوور كارێكی ناڕەوایە.

زانیاریی تایبەت: سكاڵاكە لەلایەن كەسێك تۆماركراوە بە ناوی (خالید مستەفا حوسێن) و پشتی بە ماددەی (2 و 104)ـی دەستوور بەستووە.

لێدوانی فەرمی: پارێزەرێك لەوبارەیەوە قسەی بۆ ئاڤا کردووە و دەڵێت:

 - پێشبینی ناكەم دادگا بكەوێتە ئەم هەڵەوە كە دژی ناوی وەزارەتێكی هەرێمی كوردستان بڕیار بدات، بەو پێیەی پرۆسەی ئەنفال لە بنەڕەتەوە بەو ناوە ناونراوە و بابەتەكە بەفەرمی بەو ناوە ناسێنراوە، لەسەر ئاستی نێودەوڵەتیش وەك تاوانێكی جینۆساید چەسپاوە.

- پێیموایە ئەم هەوڵە زیانی مەعنەوی بە سەدان هەزار كەس لە خانەوادەی ئەنفالكراوان دەگەیێنێت و سووكایەتییە بە قوربانیانی ئەنفال.

- ژمارەیەك ڕێكخراوی كۆمەڵی مەدەنی بەنیازن یاداشتێك پێشكەش بە لایەنە پەیوەندیدارەكان بكەن بۆ ئەوەی ئەو جۆرە هەڵمەتە ناڕەوایانە دژ بە خەڵكی ستەمدیدەی كوردستان ڕابگیرێن.

ئەوەی پێویستە بیزانیت: بڕیارە ئەم سێشەممەیە 11ی مانگ، دادگای فیدراڵی سەیری ئەم سکاڵایە و سێ سكاڵای دیکەی پەیوەست بە هەرێمی کوردستان بكات. سێ سكاڵاکەی تر دژی مەرجەکانى فرەژنى و هەڵوەشاندنەوەى وەزارەتی ئەوقاف و کاروباری ئاینی و لابردنی پێبژاردنی (غەرامە)ی هاتووچۆ و ڕسوماتى مەرجى تووندوتۆڵی ئۆتۆمبێلن.

ئەمەش بزانە: داوای هەڵوەشاندنەوەی وەزارەتێكی هەرێمی كوردستان پێچەوانەی ماددەی 121ـی دەستوورە كە بەگوێرەی بڕگەی یەكەمی ماددەكە، دەسەڵات بە هەرێمەكان دراوە مافی پیادەكردنی دەسەڵاتەكانی یاسادانان و ڕاپەڕاندن و دادوەرییان هەبێت، هاوكات ڕەگەزی بەرژەوەندی لەم سكاڵایەدا نییە بۆیە پێشبینی ناکرێت دادگای فیدراڵی لەڕووی شكلییەوە داواكە ڕەت بكاتەوە، پێشتریش جارێک سەیرکردنی سکڵاکەی دواخستبوو.