53 ڕووفاتی شنگال و حەمام عەلیل ڕادەستی کەسوکاریان دەکرێنەوە

ئاڤا نیوز

ژمارەیەک ڕووفاتی شنگال و ناحیەی حەمام عەلیل لە سنووری پارێزگای نەینەوا، دوای ئەوەی پشکنینی DNAیان بۆ کرا و ناسنامەیان ناسراوەتەوە، ئەمڕۆ لە فەرمانگەی پزیشکیی دادوەری عێراق  ناوەکانیان ئاشکرا دەکرێت و ڕادەستی کەسوکارییان دەکرێنەوە.

چیرۆکی سەرەکی: بەپێی ڕاپۆرتێکی نەتەوە یەکگرتووەکان کە لە تشرینی دووەمی 2018 بڵاوکرایەوە، زیاتر لە 200 گۆڕی بەکۆمەڵ هەن کە پاشماوەی 12 هەزار ڕووفاتیان تێدايە لەو ناوچانەی کە پێشتر لەلایەن داعشەوە کۆنترۆڵکرابوون لە عێراق، لەوانەش لە پارێزگاکانی نەینەوا، کەرکووک، سەڵاحەددین و ئەنبار.

لێدوانی فەرمی: یاسەمین مونزیر، بەڕێوەبەری بەشی گۆڕە بەکۆمەڵەکان لە فەرمانگەی پزیشکیی دادوەری عێراق بۆ ئاڤا میدیا گوتی:

- لە مانگی ئازاری ساڵی 2019ەوە 696 ڕووفات لە گۆڕە بە کۆمەڵەکانی شنگال و 102 ڕووفاتی تاکە کەسی لەسەر داوای کەسوکاریان هەڵدراونەتەوە.

- ڕووفاتەکان پشکنینی DNAیان بۆ کراوە و 243 ڕووفاتیان بە شەش قۆناغ ڕادەستی کەسوکاریان کراونەتەوە.

- لە قۆناغی حەوتەمدا 32 ڕووفاتی دیکەی شنگال و لە یەکەمین قۆناغیشدا 21 رووفاتی حەمام عەلیل دوای ئەوەی پشکنینیان بۆ کرا و ناسنامەیان ناسراونەتەوە، ئەمڕۆ ناوەکانیان ڕادەگەیێنین و هەفتەی داهاتوو ڕادەستی کەسوکاریان دەکرێنەوە.