یەكێتی ئەوروپا بەشێك لە سزاكانی سەر سووریا هەڵدەگرێت

ئاڤا نیوز

یەكێتی ئەوروپا نیازی هەڵگرتنی بەشێك لە سزاكانی سەر سووریای هەیە، بەتایبەت لەبوارەكانی وزە و گواستنەوە و دووبارە بنیاتنانەوەی ئەو وڵاتە، حكومەتی قۆناغی ڕاگوزەریی سووریا پێشوازیی لەو هەنگاوە دەكات.

وێنە گەورەكە: بڕیارە ڕۆژی 24-2-2025، كۆبوونەوەی لووتكەی وەزیرانی دەرەوەی وڵاتانی یەكێتی ئەوروپا لە بارەگای سەرەكیی یەكێتیەكە لە برۆكسڵ بەڕێوەبچێت، تەوەرێكی گرنگی كۆبوونەوەكەش، تاوتوێكردنی هەڵگرتنی سزا داراییەكانی سەر سووریایە، بەتایبەت ئەوانەی پەیوەندییان بە كەرتی وزە، گواستنەوە و ئاوەدانكردنەوە هەیە، ئەمە جگە لە ئاسانكاری لە بوارەكانی گواستنەوەی بانكی و بازرگانی لەگەڵ وڵاتانی یەكێتی ئەوروپا.

زانیاریی بەدەستهاتوو: به‌گوێره‌ی ئاژانسی ڕۆیته‌رز، ئەنجوومەنی ئەوروپا بەنیازی ئامادەكردنی ڕەشنووسێكە بۆ سنوورداركردنی سزا ئابوورییەكانی سەر سووریا بەشێوەی قۆناغبەندی، لەڕێگەی چاودێریكردنی دۆخی ئێستای ئەو وڵاتە بۆ دڵنیابوون لە بەردەوامی ڕەوایی ڕاگرتنەكە و چاوەڕوانی فیدباكی قۆناغی ئێستای سووككردنی سزاكان دەبێت.

ئەوەی پێشبینی دەكرێت: چاوەڕوان دەكرێت وڵاتانی یەكێتی ئەوروپا لە ئایندە بیر لە هەڵگرتنی یەكجارەكی سزاكانی سەر سووریا بكەنەوە لەپێناو كەمكردنەوەی كاریگەرییە ئابوورییەكان لەسەر گەلی سووریا و هاندانی هەوڵە نێودەوڵەتییەكان بۆ دووبارە ئاوەدانكردنەوەی ئەو وڵاتە.

باكگراوند: دوای هەڵگیرسانی ناڕەزاییەكانی گەلی سووریا لەدژی حكومەتی ڕووخاوی بەشار ئەسەد لە ساڵی 2011 كۆمەڵكوژی ڕژێمەکە دژ بە هاووڵاتیانی سڤیل، هەریەك لە وڵاتانی یەكێتی ئەوروپا، ئەمریكا، كەنەدا، ئوستراڵیا، سویسرا و وڵاتانی كۆمكاری عەرەبی، كۆمەڵێك سزای ئابوورییان بەسەر سووریا سەپاند.