ترەمپ: ئەگەر بایدن ساڵێکی دیکە سەرۆک با جەنگی سێیەمی جیهانی سەریهەڵدەدا

ئاڤا نیوز

سەرۆکی ئەمریکا بەردەوامە لە ڕەخنەگرتن لە ئیدارەی جۆ بایدن، سەرۆکی پێشووی ویلایەتە یەکگرتووەکانی ئەمریکا و دەڵێت ئەگەر ساڵیکی دیکە ئەو ئیدارەیە بەردەوام با جەنگ بەرپا دەبوو.

چیرۆکی سەرەکی: ڕۆژی چوارشەممە لە میانەی بەشداری کردنی لە کۆڕبەندی وەبەرهێنان لە شاری میامی لە ویلایەتی فلۆریدا کە لەلایەن سعودیە ڕێکخرابوو، دۆنالد ترەمپ هۆشداری دا ئەگەر بایدن سەرۆک با ئێستا لە جەنگی سێیەمی جیهانی دا بووین.

لێدوانی فەرمی: دۆناڵد ترەمپ، سەرۆکی ئەمریکا ڕایگەیاند: ''ئەگەر ئیدارەی بایدن بۆ ماوەی ساڵێکی دیکە بەردەوامبا ، ئەوا جەنگی سێیەمی جیهانی سەری هەڵدەدا، ئەمەش لە بەرژەوەندی هیچ کەسێکدا نەبوو''.

ئەوەی لەوبارەیەوە دەگوترێت: بەپێی زانیارییەکان ترەمپ دەیەوێت دانووستاندنەکانی پەیوەست بە کەمکردنەوەی هەوڵەکانی وڵاتانی چین و ڕووسیا بۆ پەرەپێدانی چەکی ئەتۆمی دەستپێبکات.

ئەمەش بزانە: ترەمپ لە سەرەتایی دەستبەکاربوونیەوە بەردەوام ڕەخنە لە سیاسەتەکانی جۆ بایدن، سەرۆکی پێشووی ئەمریکا دەگرێت تۆمەتباری دەکات بە سەرهەڵدانی ناکۆکیی و ئاڵۆزییەکانی ڕۆژ‌هەڵاتی ناوەڕاست.