زەوی بۆ فەرمانبەرانی ناوچەکانی دەرەوەی ئیدارەی هەرێمی کوردستان دابین دەکرێت

 

ئاڤا نیوز

فەرمانبەرانی دانیشتووی ناوچەکانی دەرەوەی ئیدارەی هەرێمی کوردستان، کە فەرمانبەری دام و دەزگاکانی حکومەتی هەرێمی کوردستانن لەوەرگرتنی زەوی سوودمەند دەبن و  بەشێکیان لە سنووری ئیدارەی گەرمیان زەوییان بۆ دابین دەکرێت.

وێنە گەورەکە: نزیکەی 8 هەزار فۆڕمی پەسەندکراو بۆ بەڕێوەبەرایەتی گشتیی شارەوانییەکانی گەرمیان گەڕێنراوەتەوە دوای گەڕانەوەی ناوی سەرجەم سوودمەندان پرۆسەی دابەشکردنی زەوی لە سنوورەکە دەست پێدەکات، فەرمانبەران لە دوو شوێن زەوی وەردەگرن، زەوی بۆ ناوچەکانی دەرەوەی ئیدارەی هەرێمی کوردستانیش دابین دەکرێت.

لێدوانی فەرمی: بارزان کەریم، بەڕێوەبەری گشتیی شارەوانییەکانی گەرمیان بە ئاڤای گوت، "فەرمانبەرانی سنووری خانەقین، ساڵح ئاغا، نەفتخانە، پێباز و  کۆکز  لەنزیکترین سنووری شارەوانی نیشتەجێبوونیان و لەسنووری شارەوانی کەلار زەوی وەردەگرن."

ئەمەش بزانە: چوار هەزار پارچە زەوی لە سنووری ڕزگاری و کەلار ئامادەکراوە، بەگوتەی بەڕێوەبەری گشتیی شارەوانییەکانی گەرمیان، تاوەکو ناوی سەرجەم سوودمەندان نەگەڕێتەوە، ناتوانن دەست بە پرۆسەی دابەشکردن بکەن، چونکە بەرچاویان ڕوون نییە کە ژمارەیان چەندە.