دەم پارتی داوای بڵاوکردنەوەی پەیامی ڤیدیۆیی ئۆجەلان دەکات و تورکیا بە نایاسایی دادەنێت

ئاڤا نیوز

ئەمڕۆ وادەی چاوپێکەوتنی وەفدی ئیمرالی و عەبدوڵڵا ئۆجەلانە و دەم پارتی داوای بڵاوکردنەوەی پەیامی ڤیدیۆیی دەکات و تورکیا ڕەتی دەکاتەوە.

وێنە گەورەکە: دەم پارتی ئامادەکاری گەورە دەکات بۆ بڵاوکردنەوەی پەیامی ڤیدیۆیی عەبدوڵڵا ئۆجەلان و بۆ ئەو مەبەستەش بانگەوازیان بۆ کۆبوونەوەی جەماوەری کردووە لە ناوەندی شارەکانی ئامەد و وان بۆ بڵاوکردنەوەی پەیامی ئۆجەلان لە ڕێگەی شاشەی گەورەوە لەو شارانە.

لێدوانی فەرمی: ئایشەگویل دۆغان، وتەبێژی دەم پارتی لە کۆنگرەیەکی ڕۆژنامەوانیدا ڕایگەیاند: داواکاریمان بۆ بڵاوکردنەوەی پەیامی ڤیدیۆیی پێشکەش کردووە و ئەم هەنگاوە دەبێتە هۆی هەڵگرتنی ئەو گۆشەگیریەی بەسەر ئیمرالیدا سەپێنراوە و لە پێناو پرۆسەی ئاشتی دەستکەوتێکی باش دەبێت.

لە لایەکی دیکەوە: یڵماز تونج، وەزیری دادی تورکیا لە وەڵامی پرسیاری ڕۆژنامەنوساندا کە ئایا پەیامەکە نوسراو دەبێت یان ڤیدیۆیی، وتی: یاساکانی تورکیا بۆ چاوپێکەوتنی زیندانیان ڕوون و ئاشکرایە و بڵاوکردنەوەی پەیامی ڤیدیۆیی دژ بە یاسایە.

ئەوەی پێویستە بیزانیت: میدیا فەرمیەکانی نزیک لە دەم پارتی باس لە بڵاوکردنەوەی پەیامی ڤیدیۆیی ئۆجەلان دەکەن و ئامادەکاریەکان بە ئاراستەی بڵاوکردنەوەی پەیامەکەن لە کاتژمێر 5ـی ئێوارەی ئەمڕۆ.