ئەمریکا و ئۆکراینا ڕێککەوتنی کانزاکان واژۆ دەکەن

ئاڤا نیوز

دۆناڵد ترەمپ، سەرۆکی ئەمریکا ڕایگەیاند، لەگەڵ ڤۆلۆدیمیر زێلێنسکی ڕێککەوتنی تایبەت بە کانزاکان واژۆ دەکەن.

وێنە گەورەکە: ترەمپ لە میانەی کۆبوونەوەی لەگەڵ سەرۆکوەزیرانی بەریتانیا، گوتی ئۆکراینا نابێتە ئەندامی ناتۆ و شەڕی نێوان ئۆکراینا و ڕووسیاش دەوەستێت. ئەو گوتیشی ڤلادیمیر پووتین، سەرۆکی ڕووسیا، بەڵێنەکەی خۆی دەباتە سەر و شەڕەکە دەوەستێنێت.

ئەوەی پێویستە بیزانیت: ترەمپ پێشتریش لەگەڵ ئیمانوێل ماکرۆن، سەرۆکی فەڕەنسا کۆبووبوویەوە و ڕۆژی هەینیش، 28-2-2025، لەگەڵ ڤۆلۆدیمیر زێلێنسکی، سەرۆکی ئۆکراینا، کۆدەبێتەوە، سەبارەت بە ڕاگرتنی شەڕ گفتوگۆ دەکەن. هاوکات ڕێککەوتنێک لەبارەی سوودوەرگرتنی ئەمریکا لە سەرچاوە کانزاییە دەگمەنەکانی ئۆکراینا واژۆ دەکەن.

ئەمەش بزانە: ترەمپ ئەوەشی گوتووە کە وڵاتانی ئەوروپا تێڕوانینی جیاوازیان سەبارەت بە ڕاگرتنی شەڕی ئۆکراینا هەیە و دەیانەوێت لە ناو دانوستانەکاندا باس لە گەرەنتیی ئەمنیی بۆ ئۆکراینا بکرێت.