پەیامێکی نێودەوڵەتی بۆ عێراق؛ گرووپە چەکدارەکان هەڵبووەشێننەوە

 

ئاڤا نیوز

لە ئاستی نێودەوڵەتی پەیامێک ئاڕاستەی بەغدا دەکرێت بۆ هەڵوەشاندنەوەی هێزە چەکدارەکانی "بەرەی مقاوەمەی ئیسلامی"،  سیاسەتمەدارێکی عێراقیش دەڵێت "بەپێچەوانەوە وڵات ڕووبەڕووی لێکەوتەی ترسناک دەبێتەوە".

وێنە گەورەکە: بەگوێرەی زانیاریی میدیاکانی عێراق، زیاتر لە 10 هەزار چەکدار لە دەرەوەی دەسەڵاتی فەرماندەی هێزە چەکدارەکانی عێراق کار دەکەن و پێداگرن لەسەر مانەوە لە دەرەوەی دامەزراوە فەرمییەکانی حکومەت، ئەمەش جگە لە دەستەی حەشدی شەعبی کە زیاتر لە 250 هەزار ئەندام لەخۆدەگرێت.

لێدوانی فەرمی: سەلیم جبوری، سیاسەتمەداری عێراقی ڕایگەیاند: تادێت  گوشاری نێودەوڵەتی لەسەر بەغدا زیاتر دەبێت بۆ هەڵوەشاندنەوەی هێزە چەکدارەکانی عێراق کە لەم دواییانەدا گورزی توندی بەرکەوتووە.

گوتیشی، عێراق لەبەردەم دۆخێکی سیاسی ئاڵۆزدایە، چونکە فشارە نێودەوڵەتی و ناوچەییەکان لەسەر حکومەتەکەی سوودانی زیادی کردووە ، تاوەکو پەیوەندییەکانی لەگەڵ تاران سنووردار بکات.  

بۆچوونی لایەنی بەرامبەر: عەلی فەتلاوی، سەرکردە لە بزووتنەوەی ئەنساروالله کە یەکێکە لە دیارترین گرووپە چەکدارەکانی عێراق بە ئاڤای  ڕاگەیاند:  هێزەکانیان بەهیچ شێوەیەک ئامادەنین دەستبەرداری چەکەکانیان بن و لە هیچ هەڕەشەیەکی دەرەکی و ناوخۆیی ناترسن.