کۆبوونەوەیەکی سێ قۆڵی لەبارەی دەستپێکردنەوەی هەناردەی نەوتی کوردستان دواخرا

ئاڤا نیوز

بڕیاربوو پێشنیوەڕۆی ئەمڕۆ سێشەممە لە وەزارەتی نەوتی عێراق، کۆبوونەوەیەکی سێ قۆڵی لەنێوان وەزارەتی نەوتی عێراق، وەزارەتی سامانە سروشتییەکانی هەرێمی کوردستان و ئەپیکۆر سەبارەت بە میکانیزمی دابەشکردنی ئەو بڕە پارەیەی تەرخانکراوە بکرێت بەڵام کۆبوونەوەکە ئەمرۆ ناکرێت.

 

وێنە گەورەکە: هەردوو وەزارەتی نەوتی عێراق و سامە سرووشتییەکانی هەرێمی کوردستان لەسەر هەناردەکردنەوەی نەوت ڕێککەوتوون، تەنانەت ڕێککارە تەکنیکییەکان تەواوکراون، بەگوێرەی گوتەی هەرسێ لایەنە پەیوەستەکە بێت دەستپێکردنەوەی پرۆسەکە لە ئان و ساتدایە و لەسەر هەندێ وردەکاری بچووک وەستاوە.

 

زانیاریی پەیامنێر: دەروون مەلا ناجی، پەیامنێری ئاڤا لە بەغدا گوتی، "بڕیار بوو کۆبوونەوەکە پێشنیوەڕۆی ئەمڕۆ دوای کاتژمێر 11 لە بینایەی وەزارەتی نەوتی عێراق بکرێت، مەبەست لە هەڵوەستە کردن بوو  لەسەر شێوازی خەرجکردنی ئەو 16 دۆلارەی کە تەرخاندەکرێت بۆ تێچووی هەر بەرمیلێک نەوت بەڵام کۆبوونەوەکە ئەمرۆ ناکرێت و دواخراوە."

گوتیشی، "لەبەشێکی کۆبوونەوەکە کۆمپانیاکان داوای گرەنتی وەرگرتنی پارەکانیان و قەرەبووکردنەوەیان دەکەن."

 

لەلایەکی دیکەوە: چەند ڕۆژێک لەمەوپێش ئەلپارسلان بایراکتار، وەزیری وزەی تورکیا گوتی، "بۆری نەوتی کەرکووک-جەیهان لە چواری ئۆکتۆبەری ساڵی 2023 یەوە ئامادەیە و ئەوان چاوەڕێی عێڕاق دەکەن بۆ دەستپێکردنەوەی هەناردەی نەوتی کوردستان".