نزیکەی 100 هەزار دۆلار لە قاسەی هاتووچۆی سلێمانی دیار نامێنێت

ئاڤا نیوز

 

هەزاران دۆلار لە بەڕێوەبەرایەتیی هاتووچۆی سلێمانی دیارنامێنێت و لیژنەیەکیش بەدواداچوونی لەبارەوە دەکات.

 

لێدوانی فەرمی: عەمید ئاسۆ محەممەد، بەڕێوەبەری هاتووچۆی سلێمانی بە ژیوار عەبدولرەحمان، پەیامنێری ئاڤا میدیای ڕاگەیاند: بڕێک پارە لە بەڕێوەبەرایەتیی هاتووچۆی سلێمانی دیار نەماوە و لیژنەیەک بۆ بەدواداچوون لە پرسەکە پێکهێنراوە و چاوەڕێی ئەنجامی لێکۆڵینەوەکان دەکەین.

 

زانیاریی بەدەستهاتوو: سەرچاوەیەک لە بەڕێوەبەرایەتیی هاتووچۆی سلێمانی ئەوەی بۆ ئاڤا میدیا ئاشکرا کرد، کە پارەکە نزیکەی 100 هەزار دۆلار دەبێت.

 

ئەمەش بزانە: بەگوێرەی یاسا کارپێکراوەکان، هەر فەرمانبەرێک یاخود کارمەندێکی حکومی وەزیفەکەی بۆ ئەنجامدانی تاوان بەکاربهێنێت، ئەوا سزاکەی تووندتر دەبێت لە تۆمەتبارێک کە فەرمانبەری حکومی نییە، هاوکات بەگوێرەی یاسای بەرزەفتکردنی فەرمانبەرانی دەوڵەت ژمارە 14ـی ساڵی 1991 کارپێکراو لە هەرێمی کوردستان، هەر فەرمانبەرێک یەکێک لە تاوانە ئابڕووبەرەکانی بەسەردا ساغ ببێتەوە، ئەوا بۆ هەتاهەتایی لە وەزیفە دووردەخرێتەوە و بەهیچ شێوەیەک لە کەرتی حکومی دانامەزرێتەوە.