ژمارەیەک خاوەن زەوی چاوەڕێی وەرگرتنی ڕەزامەندیی زەویی سندووقی دەکەن

ئاڤا نیوز

ژمارەیەک خاوەن زەوی لە سنووری بەحرکە چاوەڕێی وەرگرتنی ڕەزامەندیی زەویی سندووقی دەکەن. پارێزگای هەولێریش دەڵێت، زەویەکانیان لەدەرەوەی پلانی زەویی سندووقییە.

چیرۆکی سەرەکی: ژمارەیەک خاوەن زەوی لە سنووری شێخەشل لە قەزای بەحرکە، لە ساڵی 2014 ـەوە چاوەڕێی وەرگرتنی ڕەزامەندی زەوی سندووقی دەکەن، بەشێکیان پێیان دراوە و ئەوانەی دیکە هەر چاوەڕێن و تاوەکو ئێستا ڕەزامەندییان نەگەڕاوەتەوە.

ئەوەی پێویستە بیزانیت: جا ژمارەی ئەو خاوەن زەوییانە کە بە دیاریکراوی دەکەوێتە سنووری یاسیناوە، زیاتر لە 100 کەسن و چەند جارێک سەردانی شارەوانی دوو و قایمقامیەتیان کردووە، بەڵام بێ ئەنجام بووە.

لێدوانی فەرمی: تۆڵە مەهدی، قایمقامی بەحرکە دەڵێت، ماوەی پێنج مانگە نووسراومان بۆ پارێزگای هەولێر کردووە بۆ ئەوەی ڕێگە پێدان بدرێت بەو زەوییە سندووقییانە و ئەوان بەدواداچوونی لەسەر دەکەن.

لەلایەکی دیکەوە: لیژنەی زەوییە سندووقییەکانی پارێزگای هەولێر بە ئاڤای وت، "وەڵامی ئێمە بۆ ئەو خاوەن زەوییانە ئەوەیە کە زەوییەکانیان لەدەرەوەی پلانی زەوی سندووقین، بۆیە مامەڵەکەیان ناکرێت".