هاوشێوەی چاپکراوەن دراوە ئەلیکترۆنییەکانیش زەکاتیان لێدەردەکرێت

ئاڤا نیوز

ئەگەر  چی بەشێکی زانایانی ئیسلامی بۆچوونیان وایە کە مامەمەڵەکردن بە دراوە ئەلیکترۆنییەکان حەرامە، بەڵام زەکاتیشی دەکەوێتە سەر و پێویستە هاوشێوەی دراوە چاپکراوەکان 2.5%ی لێدەربهێنرێت. 

ئەوەی پێویستە بیزانیت: لەبارەی دراوە ئەلیکترۆنییەکان، بەتایبەت لە جیهانی ئیسلامیدا دوو بۆچوون هەیە، بەشێكی زانایان دەڵێن وەبەرهێنان وکڕین وفرۆشتن بە دراوە ئەلیکترۆنییەکان  شەرعییە و کێشەی نییە، بەشێکیشیان دەڵێن حەرامە، ماوەیەک پێش ئێستاش لیژنەی فەتوای کوردستان دراوی (پای) حەرام کرد.

لێدوانی فەرمی: د. شكار هەڵەبجەیی، شارەزای دارایی ئیسلامی سەبارەت بە زەكاتی دراوە ئەلیكترۆنییەكان بۆ ئاڤا قسەی کردووە و دەڵێت:

- لەو بابەتەدا زەكاتی ئاڵتوون دەكرێتە پێوەر، هاوكات بۆ دراوە كاغەزی و بانكییەكانیش ئاڵتوون كراوەتە پێوەر و ئەوانیش زەكاتیان لێ دەكەوێت. 

- لەبارەی دراوە ئەلیکترۆنییەکانیشەوە دەڵێت: بەشێکی زانایانی ئایینی ئیسلامی بۆچوونیان وایە کە دراوە ئەلیکترۆنییەکان حەرامن، بەپێی ئەو بۆچوونەش بێت، ئەو کەسانەی کە مامەڵە بە دراوە ئەلیکترۆنییەکانەوە دەکەن،  دەبێت ڕاستەوخۆ لە بازاڕەكە بكشێنەوە و قازانجەكەشی بەلاوە بنێن، بەڵام هەر دەبێ زەكاتی دەستمایە بدەن.

- لە هەردوو حاڵەتەکەش، واتە چ حەرام بێت چ حەڵال، بڕی زەکاتەکە هاوشێوەی پارەی چاپکراو ساڵانە 2.5% دەبێت، واتە ئەگەر بایی دەفتەرێک پای، بیتکۆین یان هەر دراوێکت هەبێت، دەبێت 250 دۆلار زەکاتی لێ بدەیت، بەڵام ساڵێکی بەسەردا سووڕابێتەوە.