200 ملیۆن مەتر دووجا زەویی مینڕێژكراو لە هەرێمی كوردستان هەیە

ئاڤا نیوز

 

هەرچەندە لە هەرێمی كوردستان تیمەكانی بەڕێوەبەرایەتییەكانی كاروباری مین بەردەوامن لە پاككردنەوەی زەوییە مینڕێژكراوەكان، بەڵام هێشتا 200 ملیۆن مەتر دووجا زەویی مینڕێژكراو ماوە كە پاكنەكراوەتەوە.

 

وێنە گەورەكە: لەگەڵ نزیكبوونەوەی وەرزی بەهار، ڕووداوەكانی تەقینەوەی مین لە ناوچە شاخاوییەكانی هەرێمی كوردستان زیاتر دەبن و بەڕێوەبەرایەتیی كاروباری مینیش هۆشیاری بە هاووڵاتییان دەدات نزیكی ناوچە مینڕێژكراوەكان نەبن.

لێدوانی فەرمی: عەلی عەبدولڕەحمان، بەڕێوەبەری گشتیی كاروباری مین لە پارێزگای هەولێر بە ئاڤا میدیای ڕاگەیاند: لەگەڵ هاتنی وەرزی بەهار، كەسانێك بۆ چنینەوەی گژوگیای بەهاری ڕوو لە ناوچە شاخاوییەكان دەكەن، تیمەكانی هۆشیاریی بەڕێوەبەرایەتیمان چالاكییەكانیان بۆ هۆشیاركردنەوەی هاووڵاتییان بۆ ئەوەی نزیكی ناوچە مینڕێژكراوەكان نەكەون، چڕتر کردووەتەوە، پێویستە ئەو كەسانەی كە گیای بەهارە دەچننەوە، وریا بن و نەچنە نزیك ئەو زەوییانەی كە مینڕێژكراون.

 

زانیاریی زیاتر: بەپێی گوتەی بەڕێوەبەری گشتیی كاروباری مین، لە سەرجەم زەوییە مینڕێژكراوەكان نیشانە و هێمای ناوچەی مینڕێژكراو هەیە و هاووڵاتییان پێیان ئاشنان، بەڵام هەندێك جار گوێی پێنادەن و سەركێشی دەكەن.

 

ژمارەكان وادەڵێن: بەپێی ئاماری دەزگای گشتی كاروباری مین:-

 

- ساڵی 2024 شەش حاڵەتی تەقینەوەی مینی چێندراو لە سەرتاسەری هەرێمی كوردستان هەبووە و سەرجەم حاڵەتەكان تەنیا بریندار بوونە.

 

- ئەمساڵ، تاوەكوو ئێستا تەنیا یەك حاڵەتی بەركەوتنی مین بووە كە لە سنووری قەزای ڕواندز ڕووی داوە و كەسێك گیانی لەدەست داوە.

 

- لە هەرێمی كوردستان 200 ملیۆن مەتر دووجا زەویی مینڕێژكراو هەیە و هێشتا پاككنەكراونەتەوە.

 

- قەزای پێنجوێن لە پلەی یەكەم و باڵەكایەتی لە پلەی دووەمی ئەو ناوچانەی هەرێمی كوردستان دێن كە زۆرترین مینیان لێ ماوە.

 

- نزیكەی 14 هەزار كەمئەندامی تەقینەوەی مین لە هەرێمی كوردستان هەن.