جارێکی دیکە کوڕەکەی مەسک لەگەڵ  ترەمپ دەردەکەوێتەوە

ئاڤا نیوز

دۆناڵد ترەمپ، سەرۆکی ئەمریکا و کوڕە بچووکەکەی ئیلۆن مەسک بەیەکەوە جارێکی دیکە دەردەکەونەوە و سەرنجی میدیاکان بەلای خۆیاندا ڕادەکێشن.

وێنە گەورەکە: لە حەوشەی کۆشکی سپیدا، ترەمپ لەگەڵ کوڕە بچووکەکەی ئیلۆن مەسک پێکەوە دەردەکەون، دواتر هەردووکیان لە هەلیکۆپتەرەکەی سەرۆکایەتی سەردەکەون و میدیاکانی ئەمریکاش وێنەیان دەگرن.

ئەوەی پێویستە بیزانیت: کوڕە بچووکەکەی ئیلۆن مەسک ناوی ئێکسە، جاری یەکەمیشی نییە کە لەگەڵ ترەمپدا دەرکەوێت، پێشتریش لەگەڵ خۆی بردوویەتی بۆ ژوورەکەی لە کۆشكی سپی.

وەک لە ڤیدیۆکەدا دەردەکەوێت، ئێکس زۆر دڵخۆش دەردەکەوێت و لەخۆشی فڕۆکەکە بەردەوام ڕادەکات، ترەمپیش ئاماژەی بۆ دەکات و دەڵێت، ئەمە ئێکسی بچووکە، دواتر هەڵیدەگرێ و دەیخاتە سەر پلیکانەی فڕۆکەکە

لەلایەکی دیکەوە: دایکی ئێکس ڕەخنە لە مەسک دەگرێت و دەڵێت، "چەندین جار بە مەسکم وتووە با ئێکس لەبەردەم کامێراکان دەرنەکەوێ، بەڵام مەسک بە قسەم ناکات".