ئەردەشێر کامکار و زۆزک قەرەداغی بەهار لە نەورۆز بڵاودەکەنەوە

ئاڤا نیوز 

 

هونەرمەندان زۆزک قەرەداغی و ئەردەشیر کامکار بەرهەمێکی هاوبەش بە ناوی بەهار بەرهەم دەهێنن و بڕیارە لە نەورۆزی ئەمساڵ بڵاوی بکەنەوە.

 

ئەوەی پێویستە بیزانیت: بەهار بەرهەمێکی نوێی هونەرمەندان، ئەردەشێر کامکار و زۆزک قەرەداغییە، تێکەڵەیەکە لە میوزیکی نوێ و فۆلکلۆری کوردی، بەرهەمەکە ڤیدیۆکلیپی بۆ کراوە و بڕیارە لە یەکەم ڕۆژی وەرزی بەهار، لە نەورۆزی ئەمساڵدا بڵاوبکرێتەوە. 

 

زانیاریی زیاتر: ئەم بەرهەمە تایبەتە بە سۆڵۆی ئامێری کەمانچە لەگەڵ ئۆرکێسترا، ئاوازەکەی هونەرمەند زۆزک قەرەداغی دایناوە و لە یەک جوڵە پێک هاتووە.

 

لێدوانی فەرمی: زۆزک قەرەداغی بە ئاڤا میدیای ڕاگەیاند، "ئەم بەرهەمە لەسەر بنەمای لێهاتوویی شێوەژەندنی کەمانچەی ئەردەشێر کامکار بوونیادنراوە، بە هاوکاریی ژەنیارانی ئۆرکێسترای تاران تۆمارکراوە".

 

ئەمەش بزانە: بەرهەمەکە پشت بە ئاوازی نوێ و فۆلکلۆری کوردی دەبەستێت، بە بنەما تەکنیکییەکانی میوزیکی کلاسیک بە شێوازی سەمای ڤاڵس، بەڵام بە شێوەیەک کە ناسنامەی نەتەوەیی خۆی پاراستووە. 

 

باکگراوند: هونەرمەندان زۆزک قەرەداغی و ئەردەشیر کامکار، چەندین کاری هاوبەشیان پێکەوە کردووە و بەهار نوێترین بەرهەمیانە.