سەرۆکكۆماری عێراق ڕۆژێك دوای هەمووان یادی هەڵەبجە دەکاتەوە

ئاڤا نیوز

ئەگەرچی دوێنێ ساڵیادی كیمیابارنی هەڵەبجە بوو، بەڵام ئەمڕۆ سەرۆکكۆمارە كوردەكەی عێراق یادی قوربانیانی كارەساتەكەی كردەوە.

چیرۆكی سەرەكی: ڕۆژی 16ـی سێ، ساڵیادی كیمیابارانی هەڵەبجەیە و دوێنێ لە سەرتاسەری هەرێمی كوردستان كاتژمێر 11:05 خولەك لە هەموو شوێنێك هەمووان چەند خولەكێك بۆ گیانی پاكی شەهیدانی ئەو كارەساتە وەستان، لە بازاڕ و شوێنە گشتییەكان و دامودەزگاكانی حكومەت و لە هەموو شوێنێك ماتەمینی ڕاگەیێنرا.

زانیاریی بەدەستهاتوو: ئەمڕۆ كە 17ـی مانگە و ڕۆژێك بەسەر ئەو ساڵیادەدا تێپەڕیوە، لەتیف ڕەشید، سەركۆماری عێراق، لە سەرۆكایەتیی كۆمار ڕێوڕەسمی ماتەمینی ساڵیادی كیمیابارانی هەڵەبجەی ئەنجام دا، كە تێیدا ژمارەیەك لە باڵیۆزی وڵاتان لە عێراق ئامادەی بوون، هۆكاری ئەو دواكەوتنەی سەرۆككۆماری عێراق كە خۆیشی كوردە، نازانرێت، ئاخۆ بۆ ئەوە دەگەڕێتەوە كە دوێنی پشوو بووە و دەوام نەبووە یاخود هۆكاری دیكەی هەیە.

لە لایەكی دیكەوە: سەرۆكایەتیی كۆماری هەواڵەكەی بڵاوكردووەتەوە بەڵام خەڵكێكی زۆر بە كورد و عەرەبەوە بە تەنزەوە بۆیان نووسیوە، هێشتا زووە، عەرەبەكان بۆیان نووسیوە تازە بەئاگا دێن، كوردەكانیش گلەییان كردووە كە لەو ڕێوڕەسمەدا یەك وشەی كوردیش نەگوتراوە نە لەلایەن سەرۆككۆمارەوە نە لەلایەن ڕێكخەرانی مەراسیمەكەوە.