بەلەمێكی كۆچبەران لە ئیجە نوقم دەبێت و تەرمی كۆچبەرێك دەدۆزرێتەوە

ئاڤا نیوز

 

شەوی ڕابردوو بەلەمێكی كۆچبەران لە دەریای ئیجە نوقم بوو، تا ئێستاش تەرمی كۆچبەرێك دۆزراوەتەوە و 19 كۆچبەریش لە خنكان ڕزگار كراون.

 

چیرۆكی سەرەكی: پاسەوانی كەناراوەكانی یۆنان، نوقمبوونی بەلەمێكی كۆچبەرانی لە كەناری دوورگەی فارماكۆنیسی نێو دەریای ئیجە ڕاگەیاند كە سەرەڕای ڕزگاركردنی 19 كۆچبەری سەرنشینی نێو بەلەمەكە، تەرمی كۆچبەرێكی خنكاویش دۆزراوەتەوە.

 

لێدوانی فەرمی: توانا عومەر، چالاكوانی پەنابەران لە ئەوروپا ڕایگەیاند، نوقمبوونی یەختەكە بەهۆی تێكشكانییەوە بووە، ڕووداوەكەش شەوی ڕابردوو ڕوویداوە و ئۆپەراسیۆنی گەڕان بەدوای چارەنووسی كۆچبەرانی دیكەدا لەلایەن هێزی سەربازیی دەریاوانیی یۆنان، دەستیپێكردووە كە گومان دەكرێت ژمارەیەكیان بێسەروشوێن بن.

 

زانیاریی تایبەت: تەرمی خنكاوەكە پیاوە و دوو لە ڕزگاركراوەكانیش منداڵن كە دۆخی تەندروستییان ناجێگیرە و ڕەوانەی بەشی چاودێریی چڕی نەخۆشخانەیەكی یۆنان كراون، هێشتا ناسنامەی كۆچبەران ئاشكرا نەكراوە و ناشزاندرێت لەنێو بەلەمەكەدا چەند كۆچبەر هەبووە.

 

زانیاریی زیاتر: لە ئۆپەراسیۆنەکەدا سێ کەشتیی پاسەوانیی کەناراوەکان و کۆپتەرێکی هێزی ئاسمانیی سەربازی بەشدارن بۆ گەڕان بەدوای چارەنووسی کۆچبەری دیكە.