دادگەی فیدڕاڵی دادبینی بۆ سکاڵایەکی باڵی گردەکەی گۆڕان دەکات

ئاڤا نیوز

 

دادگەی فیدڕاڵی عێراق دادبینی بۆ سکاڵایەکی باڵی گردەکەی گۆڕان دەکات کە دژی دانا ئەحمەد مەجید و بڕیاری کۆمیسیۆنی هەڵبژاردنەکانی عێراق تۆمارکراوە.

 

وێنە گەورەکە: ناکۆکی نێوان دوو باڵەکەی گۆڕان گەیشتووەتە دادگەى باڵاى فیدڕاڵیى عێراق، بڕیارە سبەی ڕۆژى 26-03-2025 تاوتوێی سکاڵایەک بکات کە لەلایەن هۆشیار عومەر تۆمارکراوە و داوای هەڵوەشاندنەوەی بڕیارێکى ئەنجوومەنى کۆمیسیاران و دادگەی سلێمانی دەکات.

داواکارییەکان بەمشێوەیەن: لە بڕگەی یەکەمی سکاڵاکە داواکراوە بڕیارێکى ئەنجوومەنى کۆمیسیاران هەڵبوشێندرێتەوە، کە لە 11-09- 2024 دەریکردووە و دەرفەتی شەش مانگ بەردەوامبوون لە ئەرکەکانی سەرکردایەتی ئێستای گۆڕان داوە.

ــ داواکارییەکی دیکە پەیوەستە بە هەڵوەشاندنەوەی بڕیارێکى دادگەى تاوانەکانى سلێمانى، کە 24-07-2024 دەرکراوە  بۆ ڕاگرتنى بڕیارێکى پێشووى دادگە لە دژى دانا ئەحمەد مەجید، ڕێکخەرى گشتى بزووتنەوەى گۆڕان.

 

ــ دەرکردنی فەرمانێکی دەوڵەت بۆ هەڵپەساردنی هەموو ڕێوشوێنەکانی فەرمانگەی کاروباری پارت و ڕێکخراوە سیاسییەکان لە کۆمیسیۆنی باڵای سەربەخۆی هەڵبژاردنەکان کە دوای دەست لەکارکێشانەوەی سەرکردایەتی ئێستای بزووتنەوەکە گیراون.

ئەمەش بزانە: ڕۆژی 19-09-2024، عومەر سەید عەلی، رێکخەری گشتیی پێشووى بزووتنەوەی گۆڕان، بریکارنامەی گشتیی بۆ دانا ئەحمەد مەجید کردووە بۆ بەڕێوەبردنی بزووتنەوەکە کرد، ئەنجوومەنی کۆمیسیاران مەرجی ئەنجامدانی کۆنگرەی دانا، کە دەبوایە لە 11-03-2025 بکرێت، بەڵام تاوەکو ئێستا نەکراوە.