ترەمپ داوای لە ئێران کردووە حەشدی شەعبی هەڵوەشێتەوە

ئاڤا نیوز

 

بە گوتەی باڵیۆزی ئێران لە عێراق، یەکێک لە داواکارییەکانی دۆناڵد ترەمپ، سەرۆکی ئەمریکا، لە نامەیەکدا بۆ عەلی خامنەیی، ڕێبەری باڵای ئێران، هەڵوەشاندەوەی حەشدی شەعبی بووە. 

 

وێنە گەورەکە: سێشەممە ڕابردوو، دۆناڵد ترەمپ، سەرۆکی ئەمریکا لە کۆنگرەیەکی ڕۆژنامەوانیدا ڕایگەیاند، ئێران تەنها دوو هەڵبژاردنی هەیە، دانووستان یاخود خۆئامادەکردن بۆ هێرشمان، دوا بەدوای ئەوە وەزیری دەرەوەی ئێران ڕایگەیاند، ئامادەی دانووستانی ناڕاستەوخۆین لەگەڵ ئەمریکا. 

 

لێدوانی فەرمی: محەممەد کازم ئال سادق، باڵیۆزی ئێران لە عێراق ڕایگەیاند، لە دیدی ئێرانەوە هەڵوەشانەوە یان تێکەڵکردنەوەی هێزەکانی حەشدی شەعبی جێگەی قبوڵکردن نییە.

 

ئال سادق گوتیشێ حەشدی شەعبی دامەزراوەیەکی سەربازیی فەرمیی عێراقە و تەنیا بەرپرسانی عێراق دەتوانن سەبارەت بە داهاتووی ئەو هێزانە بڕیار بدەن. 

 

لەلایەکی دیکەوە: عەباس عێراقچی، وەزیری دەرەوەی ئێران ڕایگەیاند، لە ڕێگەی عومانەوە وەڵامی نامەکەی ترەمپ دراوەتەوە و تیایدا دیدگای ئێران بۆ پرسە جیاوازەکان ڕوون کراوەتەوە.