كاركردن لە شەقامی خێرای 100 مەتریی سلێمانی چڕدەكرێتەوە

ئاڤا نیوز

شارەوانیی سلێمانی ڕایدەگەیێنێت، كاركردن لە شەقامی خێرای 100مەتری چڕكراوەتەوە و بەشەو و بەڕۆژ كاری تێدا دەكرێت، دەستیشكراوە بە دروستكردنی گەورەترین یەكتربڕی شەقامەكە كە دەبێتە گەورەترین یەكتربڕ لە شاری سلێمانی.

وێنە گەورەكە: لەچوارچێوەی بایەخدانی كابینەی نۆیەمی حكومەتی هەرێمی كوردستان بە سێكتەری ڕێگاوبان، لە مانگی تەمموزی 2020، بەردی بناغەی شەقامی 100 مەتریی سلێمانی یاخود ئۆتۆبانی بابان دانرا، كە بەچە‌ند قۆناغێك جێبە‌جێ دە‌كرێت، گوژمەی جێبەجێكردنی پڕۆژەکەش 400 ملیار دینارە.

ڕاگەیێنراوی فەرمی: سەرۆكایەتیی شارەوانیی سلێمانی ڕایدەگەیەنێت، بەسەرپەرشتی تیمی ئەندازیارانی شارەوانی لەكاتژمێر 3ـی شەوەوە دەستكراوە بە كاركردن لە یەكتربڕی ژمارە یازدە لە شەقامەكە كە دەكەوێتە تاسڵوجە و دەبێتە گەورەترین یەكتربڕی شاری سلێمانی.

ئەوەی پێویستە بیزانیت: یەكتربڕەكە بەشێوەی دایڕێکشناڵ دیزاین کراوە بە سێ ئاستی بەرزی، لە چوار پرد پێکهاتووە A,B,C,D،پردی ژمارە D کە لە ئاڕاستەی سلێمانی بۆ کەرکووک گەڕانەوەیە بۆ ئاڕاستەی سلێمانی، بەدرێژایی 105 مەتر و پانی 14 مەتر ئەمشەو دەستكرا بە كۆنكرێتكردنی كە سەرووی هەزار مەتر سێجا دەبێت.