ئاگر لە ناوەندی فەرهەنگی ئەرشیڤی دیبەگە بەردرا

ئاڤا نیوز

بەرەبەیانی ئەمڕۆ شەممە لەلایەن کەسانی نەناسراو ئاگر لە ناوەندی فەرهەنگی ئەرشیڤی دیبەگە بەردرا و بەشێک لە ناوەندەکە سووتاوە.

لێدوانی فەرمی: عدنان حاجی کاکە، خاوەنی ناوەندەکە، بە ئاڤا میدیای ڕاگەیاند: نزیکەی 12 ساڵە ئەم شوێنەمان لەسەر زەوی خۆمان دروستکردووە، بە خۆبەشی سەرپەرشتی دەکەم، مۆڵەتی فەرمیشمان هەیە.

- ئەم ناوەندە فەرهەنگییە جگە لە كۆكردنەوەی ژمارەیەك لە كەلوپەلی كلتووری، لە هەمان كاتدا ئەرشیڤی پەروەردە و خوێندنی سەرەتای سییەكانی كۆكردووەتەوە، هاوت کتێبخانە و گەلەرییشی تێدایە و خەڵکێکی زۆر سەردانی دەکات.

- بەیانی ئەمڕۆ لە ڕێگەی پەنجەرەوە هاتوونەتە ژوورەوە و ئاگر لە ناوەندەکە بەردراوە، ژوورێک سووتاوە و زیانی بە هەموو ناوەندەکە گەیاندووە.

- بەهۆی ئەوەی ئەرکێکی قورس کەوتۆتە سەرشانمان بۆ دووبارە نۆژەندکردنەوەی، سکاڵای یاساییمان تۆمار کردووە، داواکاریین تاوانباران بدۆزرێنەوە و بە سزای خۆیان بگەن، نازانین کێ ئەو کارەی کردووە و کێشەمان لەگەڵ کەسیش نیە.

ئەوەی پێویستە بیزانیت: بەر لەوەی تیمی بەرگری شارستانی بگاتە شوێنی ڕووداوەکە ئاگرەکە خۆی کوژاوەتەوە، بەپێی مەزندەی بەرگری شارستانی بێت، نزیکەی حەوت ملیۆن دینار زیان بە ناوەندەکە گەیشتووە.