بەهۆی پشووەکانی جەژن پێشبینی هاتنی زیاتر لە 100 هەزار گەشتیار بۆ هەرێمی کوردستان دەکرێت

ئاڤا نیوز

 

ناوچە گەشتیارییەکانی هەرێمی کوردستان ئامادەکارییان بۆ پێشوازی لە سەدان هەزار گەشتیار کردووە، چاوەڕوان دەکرێت زیاتر لە 100 هەزار گەشتیار پشووی جەژنی ڕەمەزانی پیرۆز لە هەرێمی کوردستان بەسەرببەن.

 

وێنە گەورەکە: جەژنی نەورۆزی ئەمساڵ هاوکاتە لەگەڵ مانگی ڕەمەزان، بەو هۆیەوە چاوەڕوان دەکرێت لە ڕۆژانی جەژنی ڕەمەزاندا سەیرانگە و کەپرە گەشتیارییەکان پڕبن لە گەشتیاری ناوخۆیی و بیانی.

 

لێدوانی فەرمی: ئیبراهیم عەبدولمەجید، گوتەبێژی دەستەی گەشتوگوزار بە ئاڤا میدیای ڕاگەیاند، "بەهۆی ئەوەی یەک هەفتە پشوو لە عێراق و هەرێمی کوردستان ڕاگەیێنراوە کاریگەری ئەرێنی لەسەر هاتنی گەشتیار دەبێت، لەهەر شەوێکدا توانای لەخۆگرتنی 100 هەزار گەشتیارمان هەیە."

 

زانیاریی زیاتر: "چەند ڕۆژێک پێش جەژن گەشتیاران شوێنی مانەوەیان لە هۆتێل و میوانخانەکان گرتووە، ئەمەش ئاماژەیەکی دیکەیە بۆ ئەوەی لە ڕۆژانی جەژن سەیرانگە و ناوچە گەشتیارییەکان پڕ دەبن." گوتەبێژی دەستەی گەشتوگوزار وادەڵێت.