مانگی ڕابردوو لە ئێران 127 کەس دەستگیرکراون و زۆربەیان کورد بوون

ئاڤا نیوز

ئاماری ڕێکخراوێکی مافی مرۆڤ لە ئێران دەریدەخات، لەماوەی مانگی ئاداری ئەمساڵ 127 کەس لە ئێران لەلایەن هێزە ئەمنییەکانەوە دەستگیرکراون، لەو ژمارەیە 66 کەسیان کورد بوون و زۆربەیان لە ئورمییە و سنە بوون.

وێنە گەورەکە: ساڵانە لە ئێران ئامارەکانی دەستگیرکردن و لە سێدارەدان ژمارەی بەرز تۆمار دەکەن. بەشێک لە وڵاتان ئێران وەک وڵاتی پێشێلکاری مافی مرۆڤ دەناسێنن.

ڕاگەیێنراوی فەرمی: ڕێکخراوی مافی مرۆڤی هەنگاو ڕایگەیاندووە، مانگی ئاداری ئەمساڵ تۆماری دەستگیرکردن لە ئێران ژمارەی پێوانەیی تۆمار کردووە، ساڵی پار لە مانگی سێ تەنیا 63 کەس دەستگیرکرا بوون، ئەمساڵ ئەو ژمارەیە دوو هێندە بووەتەوە.

ژمارەکان وا دەڵێن: لەو 127 کەسەی لە سەرتاسەری ئێران دەستگیرکراون، ئامارەکان بەم جۆرەن:

- 17 چالاکوانی ژن.

- هەشت منداڵی خوار تەمەنی 18 ساڵ.

- 66 هاووڵاتی کورد.

- 30 هاووڵاتی بەلووچ.

- 11 هاووڵاتی لوڕ.

ئەوەی پێویستە بیزانیت: پارێزگای ئورمییە زۆرترین ڕێژەی دەستگیرکراوان پێکدەهێنێت، 33 هاووڵاتی دەستگیرکراون، لەو ژمارەیەدا 30 هاووڵاتییان کورد بوون.

هۆکارە زانراوەکان: ئەگەرچی لە ڕاگەیێنراوەکەی ڕێکخراوی هەنگاو هیچ هۆکارێکی دیاریکراو نەخراوەتەڕوو، بەڵام چالاکوانێکی ڕۆژهەڵاتی کوردستان دەستگیرکردنی ژمارەیەکی زۆری خەڵک لە مانگی ڕابردوو لە ئێران بۆ چالاکییەکانی جەژنی نەورۆز گەڕاندەوە کە ئەمساڵ بە شێوەیەکی بەرفراوان ئاهەنگەکان بەڕێوەچوون.