بەرگریی شارستانیی سلێمانی مەلەكردن  لە چەم و ڕووبارەكان قەدەغە دەکات

ئاڤا نیوز

بەرگری شارستانیی سلێمانی دەڵێت، هەركەسێك لە چەم و ڕووبارەكان، گۆم و بەستەرە ئاوییە وەستاوەكان مەلەبكات، لێپرسینەوەی یاسایی لەگەڵدا دەكرێت.

وێنە گەورەكە: لەگەڵ هاتنی وەرزی گەشت و سەیران، بەشێك لە هاووڵاتیان لە چەم و ڕووبارەكان مەلە دەكەن یاخود بۆ وێنەگرتن دەچنە نێو ئاو، بێ ئاگا لە مەترسی شاراوەی ڕووبار و چەمەكان كە زۆرجار قوربانیی كارەساتباری لێ دەكەوێتەوە و لەماوەی ڕابردووشدا چەندین كارەساتی ناخهەژێن ڕوویدا.

لێدوانی فەرمی: عەمیدی مافپەروەر دیار ئیبراهیم، بەڕێوبەری بەرگریی شارستانیی سلێمانی ڕایگەیاند، "لە سۆنگەی پەرۆشیی قووڵمان بۆ سەلامەتیی گیانی ئازیزان و لەبەر رۆشنایی ئەو ڕووداوە دڵتەزێن و جەرگبڕانەی کە لە ماوەی رابردوودا گیانی چەندین رۆڵەی ئەم نیشتمانەیان لێ سەندینەوە، بە ئەرکی سەرشانی خۆمانی دەزانین کە بە توندترین شێوە هۆشداریتان پێبدەین سەبارەت بە مەلەکردن لە چەم و رووبارەکان، بەتایبەت ئەو ئاوانەی کە لێڵن، و قووڵاییەكانیان نادیارە، یان خاوەنی شەپۆلی بەهێز و گەردەلوولی ژێر ئاون.