ئیتاڵیا ڕەگەزنامەی فەخریی بە ئۆجەلان دەبەخشێت

ئاڤا نیوز

سەرۆکی شارەوانی شاری بۆلۆنیا لە ئیتاڵیا ڕەگەزنامەی فەخری بە عەبدوڵڵا ئۆجەلان، رێبەری زیندانیکراوی پەکەکە دەبەخشێت.

چیرۆکی سەرەکی: ئەمرۆ دووشەمە 2025-04-14، لە ڕێوڕەسمێکدا لە شاری بۆڵۆنیای ئیتاڵیا، ڕەگەزنامەی فەخریی بە عەبدوڵڵا ئۆجەلان بەخشرا و لەلایەن عومەر ئۆجەلان، پەرلەمانتاری دەم پارتی و برازای عەبدوڵڵا ئۆجەلانەوە وەرگیرا.

پەیامی فەرمی: عومەر ئۆجەلان لەسەر وەرگرتنی ڕەگەزنامە فەخرییەکە لە تۆڕی کۆمەڵایەتیی ئێکس دەنووسێت: شەرەفی وەرگرتنی ڕەگەزنامەی فەخریی عەبدوڵڵا ئۆجەلانم پێ بەخشرا، ئەو ڕەگەزنامەیە جێگەی شانازی و سەربەزییە بۆ ئێمە. هیوادارین ببێتە ئامرازێک بۆ ئاشتی و دیموکراسی و ئازادی.

ئەوەی پێویستە بیزانیت: ماوەی 26 ساڵە عەبدوڵڵا ئۆجەلان لە دوورگەی ئیمڕالی لە تورکیا زیندانیکراوە، دورگەکە ناوچەیەکی قەدەغەکراوە و دەورووبەرەکەی ڕووپۆشکراوە بە مین، هێزیکی 700 کەسیش چاودێریی دوورگەکە دەکەن.

باکگراوند: لە 15ـی شوباتی 1999، لە ئۆپەراسیۆنێکی هاوبەشی دەزگای هەواڵگریی ئەمریکا، تورکیا و ئیسرائیل، عەبدوڵڵا ئۆجەلان، رێبەری پارتی کرێکارانی کوردستان (پەکەکە) دەستگیر کرا و گەڕێندرایەوە بۆ تورکیا.