ڕۆیتەرز: سوپای ئەمریکا ئامادەکاری بۆ کەمکردنەوەی هێزەکانی لە سووریا دەکات

ئاڤا نیوز

دوو بەرپرسی ئەمریکی بە ئاژانسی ڕۆیتەرزیان ڕاگەیاندووە، سوپای ئەمریکا ئامادەکاری دەکات بۆ یەکخستنی هێزەکانی لە سووریا، لە چەند مانگی داهاتووشدا ژمارەیان بۆ نیوە کەم دەکاتەوە.

وێنەگەورەکە: لە سەرەتای دەستبەکاربوونی، دۆناڵد ترەمپ، سەرۆکی ئەمریکا دەیەوێت هێزەکانی وڵاتەکەی لە سووریا بکشێنێتەوە لە دوای ڕووخانی دەسەڵاتی بەشاری ئەسەدیش هەوڵەکان زۆرتر بوون، ئێستا سوپای ئەمریکا ئامادەکاری بۆ کشانەوە دەکات.

زانیاریی بەدەستهاتوو: بەرپرسێکی باڵای ئەمریکا بە ئاژانسی ڕۆیتەرزی ڕایگەیاند، سوپای ئەمریکا پلانی ئەوەی هەیە ژمارەی سەربازەکانی لە سووریا بۆ هەزار سەرباز کەم بکاتەوە.

لێدوانی فەرمی: پیت هێگێس، وەزیری بەرگری ئەمریکا ڕایگەیاند: ئەمریکا  پێداچوونەوە بە هێزە سەربازییەکانی  لە سەرانسەری جیهان دەکات.

ئەم لێدوانەی هێگێس لە کاتێکدایە، ئەمریکا لە ماوەی ڕابردوودا چەندین فڕۆکە و کەشتی جەنگی و  سیستمی بەرگری ئاسمانی بۆ بەهێزکردنی سوپاکەی بۆ ڕۆژهەڵاتی ناوەڕاست ناردووە.

ئەمەش بزانە: ئەم کشانەوەیەی ئەمریکا لە لایەک نیگەرانی ئیسرائیلی بەدوای خۆیدا هێناوە و لە لایەکی دیکەوە کاریگەری لەسەر هێزە کوردییەکانی سووریا دەبێت.

باکگراوند: لە دوای سەرهەڵدانی داعش، سوپای ئەمریکا بڕیاری ناردنی 900 سەربازی وڵاتەکەی  بۆ سووریا دەرکرد، بەڵام  لە مانگی کانوونی دووەمی ساڵی ڕابردوودا پنتاگۆن ڕایگەیاند،  ژمارەی ئەو سەربازانە بۆ 2000 بەرزکردووەتەوە.