دیاردەی نێرگەلەکێشان لە پارک و شوێنە گشتییەکانی هەولێر بنبڕدەکرێت

ئاڤا نیوز

 

لە هەولێر هەڵمەتێکی فراوان بۆ دەستبەسەرداگرتن و لەناوبردنی نێرگەلە لە شوێنە گشتییەکان دەستیپێکردووە، کە ببووە هۆکاری هەراسانکردنی خەڵکانێکی زۆر.

 

وێنە گەورەکە: ماوەیەکە نێرگەلەکێشان لە پارک و باخچە و شوێنە گشتییەکان لەلایەن گەنجانەوە، بووەتە دیاردە و خەڵکانێکی زۆر بەهۆیەوە بێزار ببوون و سیمایێکی ناشیرینی بە پارک و شوێنە گشتییەکان دابوو، بۆ بنبڕکردنی دیاردەکەش لیژنەی چاودێری و بەدواداچوونی سەر بە بەڕێوەبەرایەتیی ئەندازەی پارکەکانی هەولێر بەهەماهەنگی لەگەڵ پۆلیسی شارەوانی، هەڵمەتێکی فراوانیان بۆ بنبڕکردنی ئەو دیاردەیە دەستپێکردووە.

 

لێدوانی فەرمی: بەشی ڕاگەیاندنی بەڕێوەبەرایەتیی ئەندازەی پارکەکانی هەولێر تایبەت بە ئاڤا ڕایگەیاند، لیژنەکانی چاودێری و بەدواداچوون لەسەر سکاڵای ژمارەیەکی زۆری هاووڵاتیان دەستیان کردووە بە کۆکردنەوە و لەناوبردنی نێرگەلە کە لە شوێنە گشتییەکان دادەنران و ببووە هۆی بێزارکردنی هاووڵاتیان و سیمای ناشیرینی نێو پارک و شوێنە گشتییەکان.

 

زانیاریی زیاتر: بەڕێوەبەرایەتیی ئەندازەی پارکەکانی هەولێر دووپاتی دەکاتەوە، هەڵمەتەکە لە سەرجەم پارک و باخچە و دوورگە ناوەندییەکانی شەقامە سەرەکییەکان و پشتێنە سەوزاییەکان بەردەوام دەبێت تا دیاردەکە بەتەواوی بنبڕ دەکرێت.