سعودیە هۆشداری بە گەشتیار و عومرەکاران دەدات

ئاڤا نیوز

 

سعودیە گەشتیار و عومرەکاران ئاگادار دەکاتەوە لەوەی بەر لە بەڕێوەچوونی فەریزەی حەج بگەڕێنەوە وڵاتەکانیان، بە پێچەوانەشەوە تووشی سزای تووندی یاسایی دەبنەوە.

 

لێدوانی فەرمی: کاروان ستوونی، بەڕێوەبەری ڕاگەیاندنی حەج و عومرەی هەرێمی کوردستان بە ئاڤای گوت، "هەر کەسێک بە ناوی عومرەوە سەردانی وڵاتی سعودیەی کردبێت، دەبێت بگەڕێتەوە بۆ هەرێمی کوردستان، ئەگەریش نەگەڕێتەوە و خۆی لە شوێنێک حەشار بدات، لەکاتی دەستگیرکردنیدا بە 50 هەزار ڕیاڵ (زیاتر لە 15 هەزار دۆلار) سزا دەدرێت".

 

ئەوەی پێویستە بیزانیت: بەگوتەی کاروان ستوونی، سعودیە ئەم ڕێککارانە  بەرامبەر عومرەکاران و گەشتیاران دەگرێتە بەر:

 

-سعودیە گەشتیاران و كۆمپانیاكان ناچار دەكات بەر لە وادەی دیاریكراوی خۆیان بگەڕێنەوە وڵاتەكانیان. 

-هەر کەسێک لەڕێگەی کۆمپانیاوە ڤیزای وەرگرتبێت و خۆی لە سعودیە حەشار بدات، لە کاتی دەستگیکردنی بە 100 هەزار ڕیاڵ (زیاتر لە 30 هەزار دۆلار) سزا دەدرێت.

-جگە لە پێبژاردن، سەرپێچیکاران بە زیندانیکردنیش سزا دەدرێن.
-یەکێک لە سزاکان قەدەغەکردنی گەشتە لەسەر ئەو کەسانە.
- سزاکە لەکاتی دەستپێکردنی فەریزەی حەجی ئەمساڵ جێبەجێ دەکرێت.

 

زانیاریی زیاتر: لەکاتی سەردانەکەیاندا بۆ سعودیە، پێویستە حاجیان ڤاکسین بکرێن، لەم چوارچێوەیەشدا ڤاکسینکردنی حاجیان دەستیپێکردووە و ڕۆژانە دەیان کەس ڤاکسین دەکرێن، ئەمەش ڕێگر دەبێت لەوەی حاجیان تووشی پەتای وەرزی و نەخۆشییە گوازراوەکان بن.