لەبارەی دەنگۆی مردنی عادل ئیمام ڕوونکردنەوە دەدرێت

ئاڤا نیوز

 

کەسوکاری هونەرمەند عادل ئیمام هەموو دەنگۆیەک سەبارەت بەمردنی ئەو هونەرمەندەکە ڕەتدەکەنەوە و دەڵێن، "ئەوانەی باس لە مردنی ئیمام دەکەن بەدوای لایک و کۆمێنت دەگەڕێن."

 

چیرۆکی سەرەکی: لە چەند ڕۆژی ڕابردوودا لە تۆڕە کۆمەڵایەتییەکان دەنگۆی تێکچوونی باری تەندروستیی هونەرمەندی میسری عادل ئیمام و گواستنەوەی بۆ چاودێریی چڕ  و دواتر مردنی بڵاوبووەوە. 

 

لێدوانی فەرمی: عیسام ئیمام، بەرهەمهێنەر و برای هونەرمەند عادل ئیمام هەموو ئەو دەنگۆیانەی کە باسی مردنی براکەی دەکەن، ڕەتکردەوە و ڕایگەیاند: دۆخی تەندروستیی عادل ئیمام زۆر باشە و هیچ کێشەی نییە. 

 

زانیاریی زیاتر: عیسام ئیمام نیگەرانە لە دەنگۆی بڵاوکردنەوەی هەواڵی مردنی براکەی و دەڵێت، "نازانم ئەم دەنگۆ و پڕوپاگەندانە کەی کۆتاییان دێت، عادل ئیمام هەموو ژیانی تەرخانکرد بۆ خزمەتکردنی مرۆڤایەتی لەڕێگەی پیشکەشکردنی هونەرێکی ڕاستەقینەوە، ناکرێت بەم شێوەیە پاداشت بدرێتەوە." 

 

ئەوەی پێویستە بیزانیت: "چونکە عادل ئیمام نازناوی سەرکردە "زەعیم" ـی پێبەخشراوە و خەڵکیش بەردەوام هەواڵی دەپرسن، لەبەرامبەردا کەسانێک لەپێناو چەند لایک و کۆمێنتێک هەواڵی درۆ سەبارەت بەدۆخی تەندروستیی ئیمام بڵاودەکەنەوە". براکەی عادل ئیمام وادەڵێت.

 

ئەمەش بزانە: دوایین دەرکەوتنی هونەرمەند عادل ئیمام لە ساڵی 2020 لە زنجیرەی "ڤالێنتینۆ" بوو، کە سەرکەوتنی بەرفراوانی بەدەستهێنا.