بۆ یەكەمجار پرۆژەی قوتابخانەی دیجیتاڵی لە کوردستان جێبەجێ دەکرێت

ئاڤا نیوز

 

بۆیەكەمجار پرۆژەی قوتابخانەی دیجیتاڵی لە هەرێمی كوردستان جێبەجێ دەكرێت، بۆ ئەم مەبەستەش سەكۆیەكی ئەلیكترۆنی تایبەت بە پرۆگرامەكانی خوێندن و تاقیگەی كۆمپیتەر لە 60 قوتابخانە دادەنرێت و ڕاهێنانیش بە مامۆستایان دەكرێت لەسەر چۆنیەتی بەكارهێنانی سیستمەكە.

 

لێدوانی فەرمی: ئالان حەمەسەعید، وەزیری پەروەردەی هەرێمی کوردستان لە لێدوانێكی ڕۆژنامەوانیدا ڕایگەیاند، بەهاوکاری نێوان دامەزراوەی دەستپێشخەرییەکانی شێخ محەممەد بن ڕاشد ئال مەکتوم، سەرۆکوەزیرانی وڵاتی ئیماراتی یەکگرتوو و وەزارەتی پەروەردەی حكومەتی هەرێمی کوردستان، ئەم پرۆژەیە جێبەجێدەکرێت.

 

زانیاریی زیاتر: پرۆژەی قوتابخانەی دیجیتاڵی سەرەتا لە 14 قوتابخانە جێبەجێکرا بە زمانی عەرەبی، دواتر بە زمانی کوردی، ئێستاش کار لەسەر فراوانترکردنی پرۆژەکە دەکەین.

 

لەلایەكی دیكەوە: د. وەلید ئەحمەد، ئەمینداری گشتی پرۆژەکە گوتی، ئەم پرۆژەیە لە زیاتر لە 60 قوتابخانە جێبەجێدەکەین ، کە پێکهاتووە لە سەکۆیەکی ئەلیکترۆنی کە پرۆگرامەکانی خوێندنی بە زمانی کوردی لەخۆگرتووە لەگەل کردنەوەی تاقیگەی کۆمپیتەر لە قوتابخانەکان، هاوکات ڕاهێنان بە مامۆستایان دەکەین لەسەر چۆنیەتی جێبەجێکردنی پرۆژەکە.

 

ئەوەی پێویستە بیزانیت: قوتابخانەی دیجیتاڵی یەكەم دامەزراوەی پەروەردەیی و فێربوونی یەكگرتووە كە خوێندن بەشێوەی ئەلیكترۆنیی زیرەك لەخۆدەگرێت، تێیدا قوتابیان بەنوێترین شێوازیی فێربوون ئاشنا دەكرێن و نوێترین ئامێر و كەرەستەی سەردەمیانەیان لەبەردەست دەبێت بۆ فێربوون كە لەگەڵ مەنهەج و پڕۆگرامی جیهانی هاوتایە، هاوكات لەگەڵ دابینكردنی میكانیزمی هەڵسەنگاندنی زیرەك.