پڕۆژەی ڕووناكی ژمارەیەک گەڕەكی دیكەی هەولێر و سلێمانی ڕووناك دەكاتەوە

ئاڤا نیوز

بەپێی زانیاریی تایبەت بە ئاڤا، كارەبای نیشتمانیی 24 كاتژمێری بۆ 12 گەڕەكی دیكەی شاری هەولێر و دوو گەڕەكی دیكەی شاری سلێمانی دابین دەكرێت.

وێنە گەورەكە: لە درێژەی هەوڵەكانی حكومەتی هەرێمی كوردستان بۆ دابینكردنی كارەبای 24 كاتژمێری لەڕێگەی پڕۆژەی ڕووناكی، وەزارەتی كارەبا هەڵدەستێت بە دابینكردنی كارەبای نیشتمانی 24 كاتژمێری بۆ 12 گەڕەكی دیكەی شاری هەولێر بەمەش كۆی گەڕەكە سوودمەندبووەكانی هەولێر دەگاتە 38 گەڕەك و دوو گەڕەكی دیكەی شاری سلێمانیش پڕۆژەكەی پێ دەگات، بەمەش كۆی ژمارەی گەڕەكەكان دەبێتە 12 گەڕەك.

زانیاریی زیاتر: گەڕەكەكانی هەولێر بریتین لە (شۆڕش، كانی، نووسەران، كوێستان، كۆماری، ڕووناكی، پزیشكان، مەنتكاوە، ئازار، زانكۆ، حەمرین و شارەوانی) و گەڕەكەكانی سلێمانیش بریتین لە هەواری تازە و بەشێكی تووی مەلیك.

ئەمەش بزانە: بەمزووانە پڕۆژەی ڕووناكی لە پارێزگای هەڵەبجەش جێبەجێ دەكرێت.

ئەوەی پێویستە بیزانیت: تا ئێستا لەسەرانسەری هەرێمی كوردستان 570 هەزار هاووڵاتی كارەبای 24 كاتژمێرییان بۆ دابینكراوە و نزیكەی 729 موەلیدەی تایبەت لە 43 گەڕەك وەستێنراون كە كاریگەرییەكەی لەسەر ژینگە یەكسانە بە 126 هەزار ئۆتۆمبێل لەڕووی دەردانی گازی ژەهراوی.