فاتیمە مهاجرانی: عێراق و کوردستان بۆ جێبەجێکردنی ڕێککەوتنە ئەمنییەکان جددین

ئاڤا نیوز

وتەبێژی حکومەتی ئێران دەڵێت، هەردوو حکومەتی عێراق و هەرێمی کوردستان هەماهەنگی باشیان بۆ پاراستنی ئاسایشی سنوورەکان هەیە و بۆ جێبەجێکردنی ڕێککەوتنە ئەمنییەکانیش هەوڵی تەواو دەدەن و ئیرادەیەکی جددییان هەیە.

ئەوەی پێویستە بیزانیت: 19ی ئازاری ساڵی 2023، عێراق و ئێران ڕێککەوتنێکی ئەمنییان واژۆ کرد، بەگوێرەی ڕێککەوتنەکەش پێشمەرگەی حیزبەکانی ڕۆژهەڵاتی کوردستان و بارەگاکانیان لە سنووری ئێران دوورخرانەوە و ئەندامەکانیان بۆ شەش کەمپ لە هەولێر و سلێمانی گوازرانەوە، پێشتر چەند جارێک تاران هۆشدارییدابوو کە ئەگەر چالاکی چەکداریی دژبەری ئێران بە تەواوی ڕانەگیرێت بەپێشێلکردنی ڕێککەوتنە ئەمنییەکە لە قەڵەمی دەدات و بنکەکانیان بۆردوومان دەکاتەوە.

لێدوانی فەرمی: فاتیمە مهاجرانی، وتەبێژی حکومەتی ئێران ئەمڕۆ سێشەممە بە ڕۆژنامەنووسانی ڕاگەیاند، حکومەتی عێراق و دەسەڵاتدارانی هەرێمی کوردستان تێگەیشتن و هەماهەنگی باشیان هەیە بۆ بەدیهێنانی ئاسایشی سنوورەکان و بە تەواوی لە گرنگیی ئەم بابەتە تێگەیشتوون.

بەوتەی مهاجرانی، عێراق و هەرێمی کوردستان بۆ جێبەجێکردنی ڕێککەوتنە ئەمنییەکان هەوڵی باش دەدەن، پەیوەندی تەواویش لەنێوان بەرپرسانی هەردوو وڵاتدا هەیە و "ئیرادەیەکی جددییش بۆ جێبەجێکردنی تەواوی ڕێککەوتنەکە هەیە."