عێراق بۆ ڕزگاربوون لە گەرمای هاوین گاز بەخۆڕایی دەداتە خاوەن مۆلیدەکان

ئاڤا نیوز

ئەنجوومەنی وەزیرانی عێراق بڕیاریدا بە پێدانی 45 لیتر گاز بەبێ بەرامبەر بۆ هەر کەی ڤیەک کارەبا بەخاوەن مۆلیدەکان بۆ مانگەکانی شەش، حەوت و هەشت.

چیرۆکی سەرەکی: یەکشەممە 2025-05-11، ئەنجوومەنی وەزیرانی عێراق دانیشتنی ئاسایی خۆی بە سەرۆکایەتی محەممەد شیاع سوودانی، ئەنجامدا و تێیدا چەند بڕیارێکی گرنگ دران.

ڕاگەیێنراوی فەرمی: بەگوێرەی ڕاگەیێنراوی نووسینگەی سەرۆکوەزیران، لە کۆبوونەوەکەدا ئەنجوومەنی وەزیران بڕیاریدا بە پێدانی سووتەمەنی (گاز) بۆ مۆلیدە ئەهلییەکان بە شێوەیەکی (خۆڕایی) بەم شێوەیەی خوارەوە:

٠ 45 لیتر بۆ هەر کەی ڤییەک لە توانای بەرهەمهێنراو، بۆ مانگەکانی حوزەیران، تەمموز و ئاب.

٠ نابێت کاتژمێرەکانی دابینکردنی کارەبا بۆ هاووڵاتیان ڕۆژانە لە 20 کاتژمێر کەمتر بێت، بەجۆرێک کارەبای مۆلیدە ئەهلییەکان ڕۆژانە لە 12 کاتژمێر کەمتر نەبێت.

٠ لیژنەیەکی تایبەتمەند بەرپرسیارە لە دانانی نرخێکی گونجاو بۆ ئەمپێرەکانی دابینکراو لە مۆلیدە ئەهلییەکان، کاتەکانی بەکارخستن و چاودێریکردنی پابەندبوون بە ماوەی دابینکردن و نرخەکان.

٠ وەزارەتی دارایی بەرپرسیاریەتی بڕی پشتیوانی پێدراو دەگرێتە ئەستۆ، لەو بڕانەی کە لە کۆمپانیای دابەشکردنی بەرهەمە نەوتییەکان هەیە، لە پشکی گەنجینەی گشتی.