وەزیرانی دەرەوەی وڵاتانی عەرەبی لە بەغدا کۆدەبنەوە

ئاڤا نیوز

ئەمڕۆ وەزیرانی دەرەوەی وڵاتانی عەرەبی لە بەغدا کۆدەبنەوە و ئەو پڕۆژەبڕیارانە پەسەند دەکەن کە لە 17ـی ئەم مانگەدا دەخرێنە بەردەم لووتکەی عەرەبی.

وێنە گەورەکە: 17ـی ئەم مانگە لووتکەی وڵاتانی عەرەبی لە بەغدا بەڕێوەدەچێت و بۆ ئەم کۆبوونەوەیە پادشا و سەرۆکی هەر 22 وڵاتەکەی ئەندام لە کۆمکاری عەرەبی بانگهێشتکراون، بەڵام بەشێکیان لەوانەش سووریا و لوبنان، هەرزوو ڕایانگەیاند کە لەبری خۆیان شاند دەنێرن.

ڕاگەیێنراوی فەرمی: بەگوێرەی خشتەی ئامادەکارییەکان بۆ لووتکەی عەرەبی، ئەمڕۆ پێنجشەممە وەزیرانی دەرەوەی هەر 22 دەوڵەتە عەرەبییەکە لە بەغدا کۆدەبنەوە، لە کۆبوونەوەکەدا ئەو پڕۆژەو بڕیارانە پەسەند دەکەن کە پێویست دەکات شەممەی داهاتوو بخرێتە بەردەم سەرکردەکان لە لووتکەی وڵاتانی عەرەبی.

زانیاریی زیاتر: تائێستا ڕوون نییە کە چەند وڵات لەسەر ئاستی پادشا و سەرۆککۆمار بەشداریی دەکەن، لە عێراقیش لە ئاستی سیاسییدا نیگەرانییەک هەیە کە ڕەنگبێت کەمتر لەنیوەی وڵاتان لە ئاستی کەسی یەکەم بەشداریی لووتکەی عەرەبی بکەن، بەڵام بەوتەی تارق ئەنساری، نوێنەری قەتەر لە کۆمکاری عەرەبی، زۆرینەی وڵاتان لە ئاستی کەسی یەکەم بەشداری لووتکەی عەرەبی لە بەغدا دەکەن.