لە 10 ساڵدا 589 كۆڵبەر لە ڕۆژهەڵاتی كوردستان كوژراون

ئاڤا نیوز

لە 10 ساڵی ڕابردوودا 589 كۆڵبەر لە ناوچە سنوورییەكانی ڕۆژهەڵاتی كوردستان كوژراون، بەشێكی زۆریشیان بە تەقەی ڕاستەوخۆی سوپای پاسداران بووە.

وێنە گەورەكە: بەهۆی بێكاری و نەداری، بەشێك لە كوردانی ڕۆژهەڵات پەنا بۆ كاری كۆڵبەری دەبەن، ئەگەرچی ئەو كارە زەحمەتی و مەترسی زۆری تێدایە و زۆرجار ژیانیانی لەسەر دادەنێن.

ڕاگەیێنراوی فەرمی: بەگوێرەی ئامارێكی ڕێكخراوی کوردپا بۆ مافی مرۆڤ، ساڵی 2023 بە ساڵێكی خوێناوی دادەنرێت بۆ كۆڵبەران، زیاتر لە 341 كۆڵبەر لەلایەن هێزەكانی سوپای پاسداران كوژران و برینداركراون كە 22ـیان تەمەنیان خوار 18 ساڵ بووە.

زانیاریی زیاتر: لە ماوەی 10 ساڵی ڕابردوودا لانیكەم 589 كۆڵبەر كوژراون و هەزار و 617 كۆڵبەری دیكە برینداركراون، لەو ژمارەیە 87% یان بە تەقەی ڕاستەوخۆی سوپای پاسدارانی ئێران بووە.

لەلایەكی دیكەوە: بەپێی ڕاپۆرتێكی ڕێكخراوی هەنگاو بۆ مافەكانی مرۆڤ، تەنیا لە سێ مانگی سەرەتای ئەمساڵدا زیاتر لە 41 كۆڵبەر و كاسبكار لە ناوچە سنوورییەكانی ڕۆژهەڵاتی كوردستان بەهۆی تەقەی ڕاستەوخۆی هێزەكانی سوپای پاسداران گیانیان لە دەست داوە و 292ی دیكە بریندار كراون.