وەزارەتی ناوخۆی عێراق وردەکاریی تاوانێکی کوشتنی قێزەون بڵاو دەکاتەوە

ئاڤا نیوز

لەگەڵ زیادبوونی ڕێژه‌ى تاوان له‌ به‌غدا و پارێزگاکانی دیکەی عێراق ، ئه‌مڕۆ وەزارەتی ناوخۆی عێراق، وردەکاریی قیزەوەنترین تاوانی کوشتنی لەبەغدای پایتەخت بڵاوکردەوە دوای ئەوەی تاوانبارەکان دەستگیرکران و دانیان بە تاوانێک نا. 

چیرۆکی سەرەکی: دوو تاوانبار هەڵدەکوتنە سەر ماڵی پزیشکێک بەناوی عەلی سەعدی مه‌یاحی لە ناوچەی مه‌نسووری شاری بەغدا، دوای ئەوەی چاودێری ماڵەکەیان دەکەن و دەرفەتی ئەوە وەردەگرن کە دایکی پزیشکەکە بەتەنیا لەماڵەوەیە، دەچنە ژوورەوە و دایکەکە بەپەتێک دەخنکێنن و چاوەڕێی دکتۆر عەلی دەکەن ، ئەویش دوای ئەوەی دەگەڕێتەوە ماڵەوە هەر بەو پەتەی دایکیان پێخنکاند ئەویش دەکوژن.

چی ڕوودەدات: دوای کوشتنی دکتۆر عەلی و دایکی، دەست دەکەن بەدزین و بڕى 190 هەزار دۆلار، لەگەڵ بڕێك زێڕ دەدزن، ئەوجا تەرمی هەردووکیان دەخەنە ناو جانتایەکی گەورەی سەفەرەوە،  قاچ و دەستی هەردووکیان دەشکێنن تاوەکو لەجانتاکە جێیان ببێتەوە و جانتا دادەخەن و هەر بەئۆتۆمبێلی دکتۆرەکە دەیانگوازنەوە و جانتاکە فڕێ دەدەنە نێو ڕووبارێکی بچووکەوە لە ناوچەی ئەبوغرێب.

زانیاریی زیاتر: ئەو دوو تۆمەتبارە دانیان بەوەش ناوە کە چۆن پارەکەیان لەنێوانیاندا دابەشکردووە و هەوڵیان داوە هەموو ئاسەواری ئەو تاوانە بشارنەوە، ماڵەکەیان سڕیوەتەوە و هەموو ئەو پەتو و پەڕۆ خوێناویانەیان کردووەتە عەلاگەیەکەوە و هەر لەوێش بێ ئەوەی درکی پێبکەن عەلاگەکەیان لەبیر چووە، ئەویش بووەتە سەرەداوێک بۆ پۆلیس تاوەکو تاوانەکە بەزووترین کات ئاشکرا بکات.